Раніцай ля будынку Цэнтральнага суду Менску сабраліся некалькі сяброў моладзевага руху “Зубр”, каб падтрымаць сваю сяброўку, якую ўчора ўвечары затрымалі супрацоўнікі міліцыі. Міліцыянты спачатку не пускалі юнакоў у будынак суду, а потым не дазволілі зайсьці ў судовую залю.
Каардынатар руху “Зубр” Яўген Афнагель абураны дзеяньнямі міліцыянтаў:
(Афнагель: ) “Мы абураныя дзеяньнямі міліцыі. Нас спачатку не пусьцілі ў памяшканьне суду, хаця там ужо знаходзілася Даша. Потым нас не пусьцілі ў залю судовых паседжаньняў. Восем сяброў руху “Зубр” хацелі падтрымаць сваю сяброўку, але вымушаныя былі чакаць яе ў калідоры. Такое ўпершыню адбываецца, што нас не пускаюць на суд”.
Дашу абвінавацілі ў тым, што яна разам зь іншымі маладымі людзьмі ў цэнтры сталіцы на мосьце празь Нямігу вывесіла шасьцімэтровы плякат: “Ён павінен сысьці!” Плякат правісеў некалькі хвілінаў, яго бачылі сотні мінакоў.
Міліцыянты патрульна-паставой службы сарвалі расьцяжку і кінуліся затрымліваць маладых людзей. Усе паўцякалі, а дзяўчыну дапамог затрымаць нейкі мужчына, калі яна бегла ў мэтро па лесьвіцы.
Судзьдзя Натальля Вайцяховіч прызнала Дар’ю вінаватай у правядзеньні несанкцыянаванага пікету і пакарала штрафам на 20 мінімальных заробкаў. Студэнтка пэдагагічнага каледжу Даша Малдаванава так пракамэнтавала гэты прысуд Радыё Свабода:
(Малдаванава: ) “Я не лічу, што гэтае пакараньне правільнае, бо я гэтай расьцяжкі не вывешвала. Сапраўды, мяне там спачатку не было. Я потым была побач з тым месцам… У мяне такіх грошай няма. Пакаралі мяне, але штраф будуць плаціць бацькі”.
Сябры моладзевага руху “Зубр” паскардзіліся, што міліцыянты ніколі не вяртаюць ім затрыманых сьцягоў і плякатаў, нягледзячы на тое, што рашэньня суду аб канфіскацыі не было. Яны маюць намер зьвярнуцца ў вышэйшыя інстанцыі, каб дамагчыся вяртаньня сваёй маёмасьці зь міліцэйскіх пастарункаў.