Лінкі ўнівэрсальнага доступу

САМАЛЁТЫ НАТО ПАЧЫНАЮЦЬ ПАТРУЛЯВАЦЬ ПАВЕТРАНУЮ ПРАСТОРУ БАЛТЫІ


Юры Сьвірко, Менск

Міністры абароны Латвіі, Літвы ды Эстоніі ў панядзелак выступілі з супольным зваротам, якім віталі рашэньне НАТО калектыўна ахоўваць паветраную прастору трох краінаў Балтыі. Міністры абароны заявілі, што вайсковым самалётам, якія будуць для гэтага выкарыстоўвацца, забясьпечаць вольны і бесьперашкодны доступ у неба трох новых сяброў НАТО. Ужо ў панядзелак чатыры самалёты F-16 вайскова-паветраных сілаў Бэльгіі прыляцяць на аэрадром Зокняй на поўначы Літвы, каля гораду Шаўляй. Раней плянавалася, што першымі вахту ў небе над Балтыяй будуць несьці самалёты з Даніі, якія хацелі разьмясьціць у Віленскім міжнародным аэрапорце ўсяго за 30 кілямэтраў ад мяжы зь Беларусьсю. Абслугоўваць бэльгійскія самалёты будуць прадстаўнікі Нарвэгіі, якія прыехалі ў Шаўляй яшчэ ў пятніцу.

Міністар абароны Латвіі Атыс Слактэрыс сказаў, што ягонай краіне паветраны патруль НАТО будзе кашатваць каля 8 мільёнаў даляраў штогод. Ён таксама заявіў, што жыхары Балтыі не заўважаць натаўскіх самалётаў, бо “яны ня будуць лётаць над дахамі дамоў і перашкаджаць людзям спаць”.

Галоўнакамандуючы вайскова-паветранымі сіламі Расеі генэрал арміі Ўладзімер Міхайлаў заявіў, што ягоныя сілы будуць уважліва сачыць за тым, што адбываецца каля межаў, і ў выпадку неабходнасьці рабіць адэкватныя захады. У інтэрвію “Інтэрфаксу” генэрал арміі Міхайлаў сказаў: “Палёты натаўскіх вайсковых самалётаў у паветранай прасторы Балтыі не адаб’юцца на ваеннай бясьпецы Расеі, паколькі пры сучасных сродках зьнішчэньня ня мае вялікага значэньня, на якой адлегласьці ад мяжы — 50 або 500 кілямэтраў — знаходзяцца гэтыя сродкі”. Ужо 7 красавіка Ўладзімер Міхайлаў будзе кіраваць камандна-шатбной трэніроўкай аб’яднанай сыстэмы супрацьпаветранай абароны СНД, у якой возьмуць удзел больш за 70 баявых самалётаў дзевяці краінаў Садружнасьці, у тым ліку Беларусі. Паводле расейскіх вайскоўцаў, у рамках гэтай аб’яднанай сыстэмы пасьля зьяўленьня самалётаў НАТО ў небе краінаў Балтыі на гэтым кірунку будуць зробленыя дадатковыя захады, “у тым ліку неардынарныя, якія будуць апрабаваныя найбліжэйшым часам”.

Намесьнік камандуючага беларускімі вайскова-паветраным сіламі палкоўнік Аляксандар Шэрыс паведаміў Радыё Свабода, што Беларусь будзе браць удзел у трэніроўцы ўсімі сваімі паветранымі сіламі, аднак наконт патруляваньня самалётамі НАТО краінаў Балтыі заявіў:

(Шэрыс: ) “Ня бачым неабходнасьці якімсьці чынам камэнтаваць гэтыя факты, таму што нічога такога звышнатуральнага пакуль не адбываецца. Яны нічога там не патрулююць. Вы, па-мойму, перабольшваеце. Адна справа — авіяцыя пералятае з аэрадрому на аэрадром, іншая — патрулюе. Гэта ж розныя рэчы”.

Аднак былы галоўнакамандуючы вайскова-паветранымі сіламі Расеі Анатоль Карнукоў заклікаў расейскае кіраўніцтва не цырымоніцца з самалётамі НАТО каля сваіх межаў, а рабіць рашучыя захады: “Парушыў мяжу — сшыбаць, не рассусольваючы”. Спадар Карнукоў патлумачыў, што на балтыйскім напрамку Расея фактычна ня мае аэрадромаў, таму патрэбны час на рэакцыю, на падлёт да месца.

З пазыцыяй Анатоля Карнукова салідарны і беларускі палкоўнік Шэрыс:

(Шэрыс: ) “Дык гэтая сыстэма адпрацаваная. Калі парушаецца паветраная прастора, безумоўна, праціўнік зьнішчаецца. Гэта ўсё зразумела — якія пытаньні тут могуць быць? Ці вы хочаце сказаць, што мы дапусьцім пралёт над нашай тэрыторыяй беспакарана?”
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG