Міліцыянты зь Першамайскай раённай управы ўнутраных справаў склалі на Анатоля Шумчанку пратакол, паводле якога ён нібыта арганізаваў 24 лютага несанкцыянаваны сход прадпрымальнікаў на тэрыторыі міні-рынку “Ўручча”. І перадалі справу ў суд, які двойчы адкладаў слуханьні.
У судзе спадар Шумчанка, ягоныя калегі-прадпрымальнікі й адвакат Аляксандар Галіеў здолелі даказаць, што ніякага сходу не было. Проста лідэр “Пэрспэктывы” размаўляў са сваімі знаёмымі, што працуюць на рынку. На гэтай падставе судзьдзя Юры Гарбатоўскі вырашыў спыніць справу з прычыны адсутнасьці складу правапарушэньня. Анатоль Шумчанка і Аляксандар Галіеў назвалі гэтае рашэньне вельмі прафэсійным і рэдкім у сучаснай Беларусі.