Актывісты Маладога Фронту зьбіраліся ня толькі адзначыць памятную дату найноўшай беларускай гісторыі, але й выказаць пратэст супраць беларуска-расейскай інтэграцыі, увядзеньня ў Беларусі расейскага рубля й г.д. Але правесьці пікет у цэнтры гораду ім не далі.
У прызначаны час на Кастрычніцкім пляцы ўжо стаялі міліцэйскія начальнікі й амонаўцы. Барыс Гарэцкі, які прыйшоў на пляц са згорнутым плякатам, перад затрыманьнем пасьпеў сказаць беларускай Свабодзе:
(Гарэцкі: ) “Мэта гэтай акцыі — яшчэ раз нагадаць, што моладзь за незалежнасьць, моладзь за Беларусь! Не — расейскаму рублю!”
(Голас міліцыянта: ) “Хуценька ўзялі яго, праверылі дакумэнты, і ў машыну яго — хутка!”
Падпалкоўнік Пётар Вераб’ёў, які кіраваў затрыманьнем, паведаміў журналістам, што гэты маладафронтавец нібыта падобны на чалавека, які некалькі хвілінаў перад тым скраў непадалёк у нейкай жанчыны 100 даляраў. Маўляў, у гэтай справе яго й затрымалі.
У той жа самы час падпалкоўнік Вераб’ёў аддаваў па рацыі загады сваім падначаленым “затрымліваць на падыходах да Кастрычніцкага пляцу ўсіх маладых людзей, якія паводле пэўных прыкметаў падобныя на патэнцыйных пікетоўцаў”.
У прэсавай службе Менскай гарадзкой управы міліцыі са спасылкаю на таго ж Пятра Вераб’ёва мне паведамілі, што пасьля высьвятленьня асобы Барыс Гарэцкі (калі ён ня мае дачыненьня да крымінальных злачынстваў) будзе вызвалены.