У Бранскім унівэрсытэце ўжо некалькі гадоў існуе Цэнтр славяназнаўства. Сёлета тут адчынілі новае аддзяленьне – рэгіёназнаўства. Акурат ягоныя студэнты і сталі вывучаць беларускую мову. Распавядае дырэктар Цэнтру, доктар гісторыі Сяргей Міхальчанка.
(Міхальчанка: ) “Беларуская мова для нас не зьяўляецца самамэтай, а як бы сродкам для вывучэньня беларускай эканомікі, права, культуры, літаратуры і гэтак далей. Гэта комплекснае вывучэньне Беларусі, якое ўключае ў тым ліку і вывучэньне беларускай мовы”.
Паводле словаў дырэктара, яны рыхтуюць спэцыялістаў у галіне міжнародных стасункаў. Ва ўнівэрсытэце спадзяюцца, што такія адмыслоўцы будуць запатрабаваныя. Вось што, у прыватнасьці, мяркуе на гэты конт намесьніца дэкана Вера Панамарэнка:
(Панамарэнка: ) “Мы плянуем, што ў першую чаргу яны пойдуць у нашу Бранскую абласную адміністрацыю. Агульнавядома, што губэрнатар Бранскай вобласьці актыўна займаецца праблемай беларускага накірунку ў рамках расейска-беларускіх стасункаў”.
Намесніца дэкана таксама паведаміла, што беларуская мова ў бранскіх студэнтаў карыстаецца нават большай папулярнасьцю, чымся мовы скандынаўскіх краінаў.
(Панамарэнка: ) “У нас 30 чалавек на першым курсе рэгіёназнаўства. З іх 20 займаюцца беларускай мовай і толькі 10 – нарвэскай”.
У пэрспэктыве ў Бранскім унівэрсытэце плянуюць зарганізаваць беларускую катэдру. Расейцы ўжо зьвярталіся ў навучальныя ўстановы Гомеля, Менску з просьбай накіраваць філёляга, эканаміста, магчыма, нават правазнаўцу зь веданьнем беларускай мовы.
Пакуль прыцягнуць да выкладаньня ўдалося толькі выпускніцу філязофскага факультэту Белдзяржунівэрсытэту Алену Яфімаву. Яна і навучае бранскіх студэнтаў беларускай мове.
