Лінкі ўнівэрсальнага доступу

ПЕРАД СЯЎБОЙ ТЭХНІКУ РАЗЬБІРАЮЦЬ НА МЭТАЛАЛОМ


Казімер Яноўскі, Гомельская вобласьць

На мэхдвары племсаўгасу “Бярозкі” Гомельскага раёну большасьць мэханізатараў разьбіралі старую тэхніку на мэталалом. Грошай гаспадарка ня мае, таму за мэталалом у саўгасе спадзяюцца набыць шыны для калёсных трактароў, акумулятары ды іншыя дэталі — такі вось бартэр.

У майстэрні стаялі на рамонце два трактары МТЗ, К-700, збожжавыя сеялкі. Чацьвёра трактарыстаў і сьлесараў бавілі час каля цёплай “буржуйкі”, у якой гарэлі дровы. Распавядае мэханізатар Васіль Вушкоў, чый трактар МТЗ стаяў у майстэрні побач — яшчэ не падрыхтаваны да выхаду ў поле.

(Вушкоў: ) “Рухавік паставіў другі. Патрэбны яшчэ акумулятар, стартэр, гумавыя шыны. Яно ж відаць, чаго няма. Зараз у нас нават масла маторнага няма, каб праверыць трактары”.

Спадар Вушкоў паведаміў, што нядаўна мэханізатарам выдавалі заробак за студзень. Калі ішлі ў кантору — радаваліся, але ж атрымаўшы той заробак, моцна расчараваліся. Прынамсі, сам Васіль Вушкоў застаўся вінен саўгасу. Першаклясны мэханізатар дастаў з кішэні разьліковы квіток і прачытаў:

(Вушкоў: ) “Налічана 21 тысяча рублёў, атрымаць 19 тысяч. Аванс — 20, і 18 тысяч рублёў застаўся вінен саўгасу”.

Чаму так атрымалася, тлумачыць сьлесар Лукашэвіч:

(Лукашэвіч: ) “За студзень у нас усе вінныя засталіся. Аванс бралі — не разьлічылі. Ня 20–30 тысяч рублёў узялі, а сорак. Думалі тысяч 40 заробак будзе, а выйшла напалову меней. Таму і вінныя. Я на рамонце, бяз трактара, мне за дзень 700 рублёў ледзь набягае. Ці ж можна пражыць дзень за 700 рублёў? Булка хлеба 350–400 рублёў каштуе, і застаецца яшчэ толькі на пачак солі”.

Зрэшты, ня лепшая сытуацыя з заробкам і рамонтам тэхнікі і ў іншых гаспадарках. Галоўны інжынэр калгасу “Чырвоная плошча” Сяргей Малажаўскі прыехаў за 40 кілямэтраў у Бярозкі разжыцца хаця б старой дэтальлю да пагрузчыка ўгнаеньняў.

(Малажаўскі: ) “Усё ўпіраецца ў фінансы. Шукаем запчасткі то там, то тут. А грошай у нас таксама няма, з-за грошай уся праблема”, — кажа галоўны інжынэр калгасу “Чырвоная плошча”.

Зараз служба мэханізацыі аблсельгасхарчу асабліва націскае на падрыхтоўку трактароў вялікай магутнасьці, такіх як К-700, Т-150, МТЗ-1221. Аднак адрамантавалі іх толькі 62% ад наяўных. Як паведаміў начальнік аддзелу мэханізацыі Ўладзімер Малашэнка, толькі на рамонт трактароў К-700 бракуе 471 мільён рублёў.

Дарэчы, пошукі танных варыянтаў падрыхтоўкі тэхнікі і нават вырабу яе прыводзяць да нечаканых вынікаў. На заводзе самаходных камбайнаў аб’яднаньня “Гомсельмаш” купілі ў прыватнікаў няякасны “Тасол” — вадкасьць для ахалоджваньня рухавікоў. У выніку сапсаваліся ажно 16 рухавікоў амэрыканскай вытворчасьці, якія купілі за валюту.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG