Лінкі ўнівэрсальнага доступу

ЯКІ КАПІТАЛ ПРЫЦЯГНЕ Ў БЕЛАРУСЬ НОВЫ ІНВЭСТЫЦЫЙНЫ КОДЭКС?


Міхал Стэльмак, Менск

Паводле распрацоўнікаў Інвэстыцыйнага кодэксу, ягонае зьяўленьне выкліканае фінансавымі праблемамі Беларусі, якія спрычыніліся да тэхналягічнага заняпаду краіны.

Сёньня на большасьці прадпрыемстваў колькасьць састарэлага абсталяваньня даходзіць да 70%, і гэта не дазваляе ствараць канкурэнтаздольную прадукцыю. Абнаўленьне стрымлівае адсутнасьць інвэстараў, найперш замежных, у сувязі з чым беларускія ўлады вырашылі зьмяніць прававыя ўмовы дзейнасьці інвэстараў.

Як вынікае з тлумачэньня намесьніка міністра эканомікі Валер'я Дразда, Інвэстыцыйны кодэкс адпавядае міжнародным стандартам. Ці так гэта? З такім пытаньнем я зьвярнуўся да прадстаўніка Міжнароднай фінансавай карпарацыі ў Беларусі Карла Дагенхарта, які браў афіцыйны ўдзел у экспэртызе новага дакумэнта:

(Дагенхарт: ) "МФК некалі падавала свае камэнтары й прапановы дзеля паляпшэньня Інвэстыцыйнага кодэксу Рэспублікі Беларусь, і мушу зазначыць, што большасьць прапановаў улічылі. Варта прызнаць, што гэты кодэкс стварае больш спрыяльныя ўмовы для працы ў Беларусі замежных інвэстараў.

З другога боку, усё будзе залежаць ад практыкі. Мы ведаем, што правакарыстальная практыка і падзаконныя акты не заўжды адпавядаюць у Беларусі духу асноўных законаў.

І яшчэ — гэты кодэкс стварае больш выгадныя ўмовы для замежных інвэстараў у параўнаньні з айчыннымі. Між тым, гэтыя ўмовы мусяць быць аднолькавымі. На жаль, Беларусі трэба яшчэ прыкласьці шмат намаганьняў, каб яна паводле рэйтынгу інвэстыцыйнай прыцягальнасьці магла зраўняцца зь Літвой, Латвіяй, Эстоніяй, Польшчай, Чэхіяй", — зазначыў спадар Дагенхарт.

Ёсьць меркаваньні, што Інвэстыцыыйны кодэкс заахвоціць прыток у Беларусь расейскіх інвэстыцыяў. Прычым, тых, якія маюць сумнеўнае паходжаньне. Так, у прыватнасьці, лічыць намесьнік старшыні грамадзкага аб'яднаньня "Альтэрнатыва-ХХI" Сяргей Балыкін:

(Балыкін: ) "Шчыра кажучы, нармалёвы капітал у Беларусь ня пойдзе. Сюды пойдзе толькі рызыковы капітал. Магчыма, крымінальны капітал, найперш расейскі. Расейцы ведаюць, як рабіць бізнэс у Расеі і, вядома, ведаюць яны, як гэта робіцца і ў Беларусі. Бо тут няма рынкавай эканомікі, а дачыненьні ў гаспадарчым жыцьці ладзяцца паводле нейкіх крымінальных парадкаў. І расейцы ведаюць, як працаваць у крымінальным асяродзьдзі".

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG