(эфір 12 жніўня)
Кіраўнік транспартнае пракуратуры Мікалай Каралюк заяўляе, што справа пра зьнікненьне апэратара ОРТ Зьмітра Завадзкага хутка будзе раскрытая, аднак нічым не абгрунтоўвае сваю ўпэўненасьць у такім выніку расьсьледваньня.
Пракуратура Кіраўскага раёну Магілеўскае вобласьці патрабуе ад экс-міністра сельскае гаспадаркі Васіля Лявонава кампэнсаваць нанесеныя калгасу "Расьвет" страты.
Дэпутат Уладзімер Кудзінаў паведамляе пра чарговае парушэньне ягоных правоў адміністрацыяй менскае калёніі. Бягучы тыдзень пачаўся з аптымістычнай заявы транспартнага пракурора Беларусі Мікалая Каралюка адносна справы апэратара ОРТ Зьмітра Завадзкага, які месяц таму зьнік ў раёне аэрапорту "Менск-2". Спадар Каралюк заявіў журналісту агэнцыі "Интерфакс", што справа ў пошуках Завадзкага значна прасунулася наперад і ня выключыў, што неўзабаве журналістам будуць паведамленыя зьвесткі, што здарылася з апэратарам ОРТ. "Засталося чакаць нядоўга, хутка грамадзкасьць пра ўсё даведаецца", – гэтыя словы транспартнага пракурора адразу падхапілі рэспубліканскія мэдыі, як і ягоную катэгарычную заяву, што "зьнікненьне апэратара ОРТ ня мае дачыненьня да палітыкі". Між тым пракурор не прывёў аніякіх зьвестак у доказ сваёй перакананасьці ў хуткім вырашэньні справы. Заўважу, што ўвогуле ня йшло гаворкі пра тое, што Завадзкі будзе знойдзены. Затое пракурор нядвухсэнсоўна абяцаў паведаміць усю праўду пра гэтую гісторыю і вельмі высока адзываўся пра расейскіх калегаў, якія нібыта дапамагаюць, як могуць, беларускім сьледчым. І вось скончыўся тыдзень, і даводзіцца з сумам канстатаваць, што ніякіх сэнсацыйных зьвестак пра Завадзкага не прагучала. Ані з транспартнай пракуратуры, ані зь іншых дзяржаўных ўстановаў. І ці прагучыць, невядома. Нагадаю, пасьля зьнікненьня Юрыя Захаранкі й Віктара Ганчара з афіцыйных крыніцаў таксама гучала, што справы гэтыя не палітычныя, што вось-вось яны будуць завершаныя, бо зьніклыя самі знойдуцца, іх нават бачылі. Але ніхто сам сабою не знайшоўся, а дасьведчаныя ў прапагандысцкіх справах людзі патлумачылі – калі нейкая падзея не перастае палохаць людзей, трэба паведаміць ім контраінфармацыю, каб зьбіць гэтую хвалю. Адсюль пытаньне – ці не зьяўляецца заява пракурора Каралюка вось такой контраінфармацыяй? А з часу зьнікненьня Зьмітра Завадзкага прайшло ўжо 36 дзён. Дэпутат Уладзімер Кудзінаў даслаў на волю ліст, у якім паведаміў, што адміністрацыя калёніі зноў яго прыціскае. Вось што распавядае жонка дэпутата Зоя Кудзінава, якая днямі атрымала гэты ліст: (Кудзінава: ) "Піша, што ў шахматна-шашачным турніры іх каманда займае прызавыя месцы і за гэта ім вырашылі зьняць спагнаньні. Па адным спагнаньні дваім зь яго каманды зьнялі, а яму не. Зараз начальніка калёніі няма. Піша, што пасьля выхадных пойдзе да Лася Яўгена Адольфавіча, намесьніка начальніка, вырашаць гэтае пытаньне. Нават у гэтым парушэньне правоў чалавека. Калі вы ўжо паабяцалі, дык рабіце для ўсіх аднолькава. Але не. Яму спагнаньне пакінулі". Нагадаю, за амаль тры гады зьняволеньня супраць дэпутата Кудзінава ўжо выкарыстоўвалі ў якасьці сродку перавыхаваньня наступныя сродкі ўзьдзеяньня: пазбаўленьне спатканьняў, затрымкі пошты, карцар, зьбіцьцё і неабгрунтаваныя заўвагі, пры наяўнасьці якіх немагчыма разьлічваць на датэрміновае вызваленьне. У Кудзінава такія заўвагі ёсьць і гэта ўскладняе ягоныя шанцы выйсьці на волю раней тэрміну. Другі дэпутат, Андрэй Клімаў, нарэшце падаў у суд касацыйную скаргу на вынесены яму прысуд у канчатковым выглядзе. Маё "нарэшце" адрасуецца ня Клімаву, а ягоным адвакатам, якія не асабліва прысьпешвалі падачу гэтага дакумэнта. Жонка Клімава Тацяна распавяла, што позаўчора Клімава наведала ў турме адвакатка Вольга Ўльяшына, зь ёй Клімаў рыхтуецца да касацыйнага разгляду, які адбудзецца 22 жніўня. Тацяна Клімава: (Клімава: ) "Адвакатка сьведчыць, што настрой у яго добры. Можа нейкія надзеі… А я думаю, што настрой у яго быў добры ад таго, што напярэдадні яго наведала дэлегацыя Парлямэнцкай Асамблеі Рады Эўропы". Паводле жонкі дэпутата Клімава, дэпутаты з ПАСЭ, якія наведвалі Клімава, сьцьвярджалі, што на сустрэчы з прэм'ерам Ярмошыным ставілі пытаньне пра вызваленьне Клімава й Кудзінава. Але старшыня беларускага ўраду заявіў ім, што гэта не ў ягонай кампэтэнцыі. "Мы ўсё роўна не пакінем справы беларускіх палітычных вязьняў, асабліва дэпутатаў, без увагі эўрапейскіх структураў", – запэўнілі Ярмошына прадстаўнікі ПАСЭ. Экс-міністра сельскае гаспадаркі Васіля Лявонава вырашылі ў аршанскай калёніі патурбаваць кіраўскія пракуроры. Ад яго патрабуюць кампэнсаваць калгасу "Расьвет" страты, быццам бы нанесеныя разам з Васілём Старавойтавым. Усяго гэта прыкладна 150 тысячаў рублёў. Цікава, што суд прыняў рашэньне пра спагнаньне гэтых грошай зь Лявонава, але не на карысьць "Расьвету", а на карысьць дзяржавы. Цяпер у Кіраўску схапіліся за галаву, што грошы могуць да іх і не патрапіць і зноў выставілі прэтэнзіі былому міністру. Ягоныя інтарэсы ў судзе будзе абараняць абаронца Сьвятлана Ўласава, дачка Лявонава, а весьці справу – тая ж судзьдзя Надзея Чмара, якая асудзіла Васіля Лявонава. Паглядзім, якім будзе вынік працэсу.
