Лінкі ўнівэрсальнага доступу

Навіны 02 чэрвеня 2000 г.


Сяргей Астраўцоў, Горадня

У працягу апошніх сутак склалася напружаная сытуацыя на аўтапераходзе Брузгі, што на беларуска-польскай мяжы. З 1 чэрвеня тут пачалі спаганяць новы мясцовы збор, фактычна, за знаходжаньне машынаў у чарзе на мытню. Кіроўцы сустрэлі новы збор страйкам. Пракурор Гарадзенскага раёну Барыс Таранка з нагоды напружанае сытуацыі прыпыніў дзеяньне гэтага рашэньня раённага савету. На пераходзе Брузгі пабываў наш карэспандэнт Сяргей Астраўцоў.

Больш за паўтысячы чалавек заблякавалі праезд у Польшчу. Каля 9 гадзін ні адна машына не праехала за мяжу. Рух аднавіўся толькі каля сямі гадзінаў вечара. Аднак у 21 гадзіну, калі карэспандэнт Свабоды знаходзіўся ў Брузгах, руху машын у бок Польшчы зноўку не было заўважна.

"Вінавата польская мытня," – патлумачыў капітан, які быў сярод некалькіх дзесяткаў міліцыянтаў старэйшым. На ўезьдзе ў нэўтральную зону яшчэ адчувалася напружаньне. Стаялі дзьве машыны з АМОНам, некалькі машынаў ДАІ. Пасьля нашай размовы міліцыя пажвавела, пачала прапускаць машыны.

Шафёраў абурыла, што раптам дзяржаўнае прадпрыемства "Мяжа" пачало спаганяць па 2600 рублёў з кожнага беларускага легкавіка. Для замежнікаў кошт большы – 10 даляраў, а для аўтобусаў – 50. У Брузгі утаймоўваць страйк прыехала міліцэйскае начальства, а таксама намесьнік старшыні райвыканкаму Станіслаў Жывалеўскі і раённы пракурор Барыс Таранка, які тэрмінова прыпыніў рашэньне аб мясцовым зборы. Паводле вэрсіі міліцыі, людзі тады разыйшліся па машынах. Аднак ад тых, хто чакаў выезду ў Польшчу, я пачуў іншае.

Адзін малады мужчына з крыкам: "Давіць трэба гэтае быдла!" – заскочыў у аўтобус і паехаў проста на людзей, якія не разыходзіліся. Камусьці нібыта наехаў на нагу, кагосьці выцягнулі з-пад колаў. Людзі пачалі біць яму шыбы. Міліцыянты, па словах шафёраў, даволе мірна забралі яго з сабой. І вось тады напалоханая публіка пачала сапраўды разыходзіцца.

А 10-й вечара АМОН заставаўся на месцы. На прадпрыемстве "Мяжа" вісеў замок. Чарга зь легкавых машынаў расьцягнулася на 2 км. Чакаць давядзецца да двух сутак, гаварылі мне шафёры.

Сёньня ў мяне адбылася размова са старшынём Гарадзенскага райсавету Аляксандрам Саўцовым. Рашэньне райсавету было запатрабавана, аказваецца, у генэральную пракуратуру, і ў абласную. Але яно не супярэчыць закону аб бюджэце 2000 году, сказаў старшыня райсавету. "Там прадугледжаныя і зборы за паркоўку ў спэцыяльна адведзеных месцах. Іншая справа, што машыны ў Брузгах стаяць проста на дарозе. Аднак гэтая дарога тупіковая. Беларусь там сканчаецца, і таму месца цалкам можна лічыць стаянкай, – патлумачыў ён. Такім чынам, пакуль што збор за паркоўку спаганяцца ня будзе, ва ўсякім разе, дзесяць дзён.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG