Лінкі ўнівэрсальнага доступу

Навіны 28 сакавіка 2000 г.


Аляксей Дзікавіцкі, Пінск

Сёньня арганізатары акцыі, што адбылася на Дзень Волі ў Пінску, былі выкліканыя а 10-й гадзіне ў мясцовы ГАУС. 25 сакавіка ў Пінску прайшоў мітынг-канцэрт, у якім узялі ўдзел каля трохсот чалавек. Міліцыянты склалі пратаколы на Віктара Ярашука і Алеся Моргаля і накіравалі абодвух у суд.

Напярэдадні ў гарвыканкаме арганізатарам акцыі Віктару Ярашуку і Алесю Моргалю прапанавалі даць расьпіску, што пад час мітынгу яны ня будуць выкарыстоўваць ніякай нацыянальнай сымболікі, бо заяўка была падазеная ў выканкам ад імя грамадзянаў, а не палітычных партыяў, якія маюць нацыянальныя сьцягі ў якасьці афіцыйна зацьверджанай сымболікі. Аднак зрабіць гэта арганізатары адмовіліся.

Натуральна, што мітынг на Дзень Волі прайшоў пад бел-чырвона-белымі сьцягамі. Менавіта абвінавачаньні ў незаконным выкарыстаньні сымболікі і былі прад'яўленыя сёньня ў міліцыі спадаром Моргалю і Ярашуку. Ім паказалі таксама фотаздымкі выступоўцаў і ўдзельнікаў мітынгу, некаторыя зь якіх трымалі бел-чырвона-белыя сьцягі.

Аргінізатары з абвінавачаньнем не пагадзіліся, паколькі асабіста яны ніякіх сьцягоў пад час мітынгу не трымалі, а былі занятыя арганізацыйнымі пытаньнямі. Дарэчы, аб гэтым сьведчаць і апэратыўныя здымкі. Нягледзячы на гэта, міліцыянты склалі на арганізатараў акцыі пратакол аб адміністрацыйным правапарушэньні. Копію патакола актывістам выдаць адмовіліся і прапанавалі адразу ісьці ў суд. Аднак на просьбу Віктара Ярашука, які хутка мусіць зьяжджаць у Варшаву на тыднёвую вучобу, судовае паседжаньне перанесенае на 10 красавіка.

Адзін з арганізатараў мітынгу-канцэрту, старшыня Пінскай арганізацыі БНФ "Адраджэньне" Алесь Моргаль так пракамэнтаваў сёньняшні візыт у міліцыю для нашага Радыё:

"Абвінавачаньні, якія былі сёньня нам пра'яўленыя як арганізатарам мітынгу, ня маюць пад сабой ніякіх падставаў і сьведчаць толькі аб тым, што ўлады баяцца свайго народу і дзейнічаюць, мякка кажучы, некарэктна. Калі б былі падставы для прыцягненьня нас да крымінальнай адказнасьці, чаму гэта не было зроблена адразу пад час мітынгу, прылюдна? Суд прызначаны на 10 красавіка. Будзем рыхтавацца да суду".

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG