Сёньня

Выбарчая камiсія Берасьцейскай-Цэнтральнай акругі №2, якая не зарэгiстравала старшыню абласной арганiзацыi БСДП “Народная Грамада” Анатоля Ляўковiча ў якасьцi кандыдата ў дэпутаты “Палаты прадстаўнiкоў”, працягвае цiкавiцца справамi лiдэра мясцовых сацыял-дэмакратаў. Прычым гэтая цiкавасьць набывае дзiўныя рысы. Сябры выбарчае камiсіi зьвярнулiся да рэдакцыяў некаторых берасьцейскiх газэтаў з настойлiвай просьбаю паведамiць, цi атрымлiваў спадар Ляўковiч ганарары за публiкацыю сваiх артыкулаў.

Матэрыялы Анатоля Ляўковiча, якi таксама ўзначальвае Берасьцейскую філію БГК, сапраўды зьмяшчалiся ў мясцовым друку. Але чаму менавiта ягоныя публiкацыi выклiкалi iнтарэс у выбарчай камiсіi i якое дачыненьне гэта мае да намераў спадара Ляўковiча балятавацца у “Палату прадстаўнiкоў”, застаецца загадкаю. Тым больш, што пра публiкацыi iншых вылучэнцаў, як зарэгiстраваных у якасьцi кандыдатаў, гэтак i тых, каму ў тым адмоўлена, сябры камiсіяў не пытаюцца…

Сам Анатоль Ляўковiч, скарга якога на адмову рэгiстраваць яго ў якасьцi кандыдата 20 верасьня разглядаецца Цэнтарвыбаркамам, заявiў што выбарчая камiсія Берасьцейска-Цэнтральнай акругі №2 ў чарговы раз груба парушае закон. Раней гэтая камiсія, адмовiўшы лiдэру мясцовых сацыял-дэмакратаў, адначасова прыняла рашэньне працягваць спраўджваньне падпiсных лiстоў выбаршчыкаў, якiя вылучылi спадара Ляўковiча кандыдатам у дэпутаты (усяго ў акрузе было сабрана 7,5 тысячаў такiх подпiсаў).

Згодна з Выбарчым кодэксам працэдуру праверкi можна праводзiць да моманту рэгiстрацыi, якая скончылiся 14 верасьня. На думку Анатоля Ляўковiча, сваiмi дзеяньнямi акруговая камiсія фактычна робiць усё, каб атрымаўся байкот выбараў у “Палату прадстаўнiкоў”. Ва ўсялякiм выпадку ў згаданай берасьцейскай акрузе ў цяперашняй сытуацыi гэта цалкам верагодна.

Алег Супрунюк, Берасьце