Лінкі ўнівэрсальнага доступу

Сёньня


У дзяржаўнай прэсе апублікаваны дэкрэт Аляксандра Лукашэнкі, якім кіраўнік дзяржавы ўключыў у склад Цэнтральнае выбарчае камісіі прадстаўнікоў партыяў, што вырашылі браць удзел у парлямэнцкіх выбарах. У сувязі з гэтым дэкрэтам лідэр ПКБ Сяргей Калякін абвінавачвае ўладу ў фальсыфікацыі.

Падпісаным учора дэкрэтам Аляксандар Лукашэнка пастанавіў увесьці ў склад Цэнтральнае выбарчае камісіі прадстаўнікоў дзевяцёх партыяў, якія ўдзельнічаюць у выбарах. Гэтым асобам надаецца права дарадчага голасу, яны могуць уносіць прапановы, выступаць на паседжаньні й знаёміцца з дакумэнтамі камісіі, але ня маюць права ўдзельнічаць у галасаваньні й праверках.

У афіцыйным камэнтары да дэкрэту адзначана, што ён зьяўляецца пацьверджаньнем гатовасьці дзяржаўных ворганаў “да канструктыўнага дыялёгу й супрацоўніцтва зь міжнароднымі інстытутамі й грамадзка-палітычнымі сіламі Беларусі”.

Высьвятляецца, аднак, што гэтае “супрацоўніцтва” адміністрацыя Лукашэнкі разглядае вельмі своеасабліва. Гаворыць першы сакратар ПКБ Сяргей Калякін:

(Калякін: ) “Я бачу, што тут літаральна зроблены падлог. У склад Цэнтральнае выбарчае камісіі ўключаны Бядуля Ўладзімер Лявонцьевіч ад Партыі камуністаў Беларускай. Я вельмі добра стаўлюся да Бядулі, гэта вельмі заслужаны і адказны чалавек, але сытуацыя ўся ў тым, што мы Бядулю ад партыі камуністаў не прапаноўвалі ў Цэнтарвыбаркам. Уключылі прадстаўніка партыі бяз згоды самое партыі – я такога яшчэ не сустракаў…”

Калякін паведаміў, што партыя вылучыла ў склад камісіі зусім іншую кандыдатуру — сакратара ЦК Аляксандра Пахлопка. “Відаць, адміністрацыя прэзыдэнта ўзяла на сябе паўнамоцтвы кіруючага воргана Партыі камуністаў”, — іранізуе Сяргей Калякін. ПКБ зараз рыхтуе адмысловую заяву з нагоды гэтага падману.

Іншая, драбнейшая, фальсыфікацыя была ўчынена Беларускім нацыянальным тэлеканалам. Учора адразу пасьля “Панарамы” гледачы маглі пабачыць нібыта жывы эфір дэбатаў кандыдатаў у дэпутаты. Лідэр ПКБ Сяргей Калякін удзельнічаў у гэтых тэледэбатах…

(Калякін: ) “Я магу сказаць, што гэтую перадачу ледзь пазнаў. Бо яна ўвогуле страціла ўсялялі сэнс і зьмест. Там былі навырываныя асобныя выступы асобных лідэраў партыяў, зусім выцягнутыя з кантэксту. Там проста незразумела, пра што гаварыў чалавек, бо вырываўся літаральна адзін сказ зь ягонае прамовы ці ягонага меркаваньня”.

Дарэчы, сама дыскусія запісвалася ў панядзелак, 4 верасьня, і доўжылася звыш 2 гадзінаў. Аднак БТ паказала толькі менш за гадзіну. Вядучы праграмы, нехта Філіпаў, нязграбна ствараў ілюзію, нібыта ён прымаў у жывы эфір нейкія тэлефанаваньні грамадзянаў… Гаворыць Сяргей Калякін…

(Калякін: ) “Яны былі загадзя адабраныя, загадзя зрэжысаваныя, і былі накіраваныя на тое, каб дыскрэдытаваць адных і паспрабаваць у лепшым сьвятле рэпрэзэнтаваць іншых. У прыватнасьці, намялявалі рэйтынг Камуністычнае партыі Беларускай, нібыта яны выйшла на першае месца паводле тэлефанаваньняў. А зь іншага боку, яны спрабавалі прынізіць Партыю камуністаў Беларускую і нейкім чынам ачарніць кіраўніка партыі Калякіна. Улада імкнулася стварыць чарговы прапагандысцкі ролік. І гэта, дарэчы, на маю думку, ёй не ўдалося”.

Калякін, аднак, заяўляе, што й надалей будзе браць удзел у падобных тэлевізійных перадачах. “Разумны ўсё зразумеў, гледзячы гэтую перадачу”, – заяўляе лідэр партыі камуністаў.

Тым часам былому камуністу, а цяпер беспартыйнаму Валерыю Шчукіну 28-я акруговая полацкая камісія адмовіла ў рэгістрацыі ў якасьці кандыдата ў дэпутаты. Камісія знайшла ажно тры прычына для адмовы. Шчукін заяўляе, што будзе абскарджаць гэтае рашэньне.

Віталь Цыганкоў, Менск

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG