У Менску знаходзіцца былая старшыня Парлямэнцкай асамблеі
Рады Эўропы, а цяпер Ганаровая старшыня гэтай арганізацыі спадарыня Лені
Фішар. Яна бярэ ўдзел у міжнароднай канфэрэнцыі “Эўропа XXI стагодзьдзе:
жанчыны й палітыка”, якую наладзіў Жаночы незалежны дэмакратычны рух. Пад
час канфэрэнцыі нашая карэспандэнтка пацікавілася стаўленьнем спадарыні
Фішар да перадвыбарчае сытуацыі ў Беларусі.
Вядома, што ў 96-м годзе, напярэдадні рэфэрэндуму, старшыня Парлямэнцкай
асамблеі Рады Эўропы Лені Фішар наведвала Беларусь. Сёньня пад час канфэрэнцыі
яна ўзгадала тыя падзеі і нават публічна выказала сваё расчараваньне вынікамі
таго візыту. Спадарыня Фішар адзначыла, што цяперашняя перадвыбарчая сытуацыя
ў Беларусі чымсьці падобная на тую, што была чатыры гады таму.
Я запыталася ў спадарыні Фішар пра ейныя прагнозы адносна магчымае рэакцыі
эўрапейскае супольнасьці на вынікі выбараў у “Палату прадстаўнікоў”…
(Фішар: ) “Мне вельмі цікавая гэтая краіна. Так, я была тут у 96-м годзе
напярэдадні рэфэрэндуму. І зараз рэтраспэктыўна мне бачна, што праблемы
трэба бало вырашаць яшчэ тады…
Але цяпер, напярэдадні выбараў, я ня ўмешваюся ў працу АБСЭ, ЭўраЗьвязу
й гэтак далей. Я прыехала ў Менск на міжнародную канфэрэнцыю, каб падтрымаць
большую еднасьць у жаночым асяродзьдзі”, — зазначыла Лені Фішар.
Ты ня менш, яна добра інфармаваная пра перадвыбарчую сытуацыю ў Беларусі:
“Я знаёмая з сытуацыяй, я чытала шмат аналітычных матэрыялаў, афіцыйных
справаздачаў з розных крыніцаў і ведаю, што значныя парушэньні былі яшчэ
да пачатку выбараў. І мне падаецца, што ў рэшце рэшт мы ўбачым цяжкую дэклярацыю
ад імя “тройкі”. Я не працую над гэтым, таму не магу паведаміць, што менавіта
ў ёй будзе. Але мы мусім у будучым знайсьці шлях для разьвіцьця дэмакратычных
сілаў Беларусі”, — лічыць спадарыня Фішар.
Пакуль яна не гатовая прадказаць магчымую рэакцыю эўрапейцаў да вынікаў
выбараў у “Палату прадстаўнікоў”.
(Фішар: ) “Цяпер сытуацыя вельмі падобная на тую, што была ў 96-м годзе.
Існуе такая ж рэакцыя ўладаў. Яны даюць такія ж парады ўдзельнікам розных
бакоў. І якія будуць наступствы, цяжка прадказаць. Усё залежыць ад пазыцыі
ўладаў”.
— зазначыла Ганаровая старшыня Парлямэнцкай асамблеі Рады Эўропы спадарыня
Лені Фішар.
Ганна Соусь, Менск
Самае папулярнае
1