ЦВК Азэрбайджану апублікавала афіцыйныя вынікі парлямэнцкіх выбараў
5 лістападу і назвала чатыры партыі, якія атрымалі месцы ў парлямэнце краіны.
Пасьля гэтага дзьве апазыцыйныя партыі адмовіліся ад сваіх дэпутацкіх мандатаў.
13 партыяў і блёкаў вялі барацьбу ў часе парлямэнцкіх выбараў у Азэрбайджане
за 25 месцаў у парлямэнце паводле партыйных сьпісаў і 100 месцаў, вызначаных
для аднамандатных акругаў.
Адзначу, што самая ўплывовая апазыцыйная партыя Азэрбайджану “Мусават”
не была дапушчаная да выбараў, паколькі Цэнтарвыбаркам заявіў, што з 56
тысячаў подпісаў, якія партыя сабрала для ўдзелу ў выбарах, 7 тысячаў –
несапраўдныя. Нагадаю, што дзьве траціны сяброў Цэнтарвыбаркаму – гэта
сябры партыі “Ені (гэта значыць: “новы”) Азэрбайджан”, якой кіруе сын прэзыдэнта
Гэйдара Аліева – 38-гадовы Ільхам.
Гэтая партыя і выйграла выбары. Паводле афіцыйнага падліку, яна атрымала
амаль 63% галасоў. На другім месцы – “Народны фронт Азэрбайджану” з 10.8%.
Далей партыя Грамадзянскай Салідарнасьці і Камуністычная.
За хадой выбараў сачылі блізу 300 міжнародных назіральнікаў, палова
зь якіх аказвала Арганізацыю Бясьпекі і Супрацоўніцтва ў Эўропе. На падставах
іхных справаздачаў прадстаўнік Парлямэнцкай Асамблеі Рады Эўропы назваў
гэтыя выбары «фарсам» і сказаў, што назіральнікі ад ПАРЭ яшчэ «нідзе ня
бачылі гэткай колькасьці фальсыфікацыяў».
У сваю чаргу прадстаўнікі апазыцыйных партыяў выступілі з заявай, у
якой падкрэсьлілі, што «ўлады нясуць адказнасьць за масавае фальшаваньне
на выбарах і за невыкананьне сваіх абавязкаў перад Радай Эўропы». Сярод
парушэньняў, адзначаных назіральнікамі, фігуруюць: падкіданьне бюлетэняў
на карысьць «Ені Азэрбайджан», хабарніцтва і запалохваньне выбаршчыкаў.
І вось учора, пасьля афіцыйнага абвешчаньня вынікаў выбараў, прадстаўнікі
апазыцыйных «Народнага Фронту» і «Грамадзянскай салідарнасьці», якія атрымалі
адпаведна 4 і 2 месцы ў парлямэнце, адмовіліся ад гэтых месцаў. У адпаведнай
пастанове апазыцыя заявіла, што новы парлямэнт абраны «ў выніку татальнай
фальсыфікацыі вынікаў выбараў і з парушэньнем Канстытуцыі краіны ды міжнароднага
права, а таму яны не адлюстроўваюць волі народу».
У сувязі з гэтым апазыцыя заклікала сваіх прыхільнікаў у наступную сыботу
правесьці акцыі пратэсту.
Сяржук Сокалаў-Воюш, Прага.
Самае папулярнае
1