Лінкі ўнівэрсальнага доступу

Літоўскі Сойм даў зялёнае сьвятло пабудове Вісагінскай АЭС


Рэактар старой Ігналінскай АЭС
Рэактар старой Ігналінскай АЭС

У чацьвер Сойм Літвы прагаласаваў за зьмены ў Законе аб атамнай электрастанцыі, неабходныя для рэалізацыі плянаў будаўніцтва Вісагінской АЭС, і за канцэсiйную дамову з стратэгічным інвэстарам Hitachi.

Па адной з найбольш важных зьменаў праводзілася пайменнае галасаваньне, апошні раз такая практыка ўжывалася ў 1993 годзе.

Галасаваньне працягвалася паўгадзіны, затым старшыня Сойму Ірэна Дзягуцене абвясьціла, як прагаласаваў кожны дэпутат. Усяго ў ім бралі ўдзел 74 дэпутаты. Па пытаньні зьменаў закону аб АЭС галасавалі 70 парлямэнтароў, супраць — 2, устрымаліся — 2. Папраўкі былі прынятыя. Сацыял-дэмакраты адмовіліся ад удзелу ў галасаваньні.

У галасаваньні наконт закону аб перадачы канцэсіі і прыняцьці Літоўскай Рэспублікай на сябе маёмасных абавязаньняў з 74 дэпутатаў 69 галасавалі за, 2 — супраць і 3 — устрымаліся. Канцэсійная дамова з стратэгічным інвэстарам — японскім канцэрнам Hitachi — была ўхваленая.

Пасьля абодвух галасаваньняў з шэрагаў прыхільнікаў і апанэнтаў АЭС, якія сабраліся на бальконе залі паседежаньняў, гучалі як воплескі, так і крыкі незадавальненьня. Сьпікер сойму Ірэна Дзягуцене была нават вымушана супакойваць апанэнтаў пабудовы АЭС і нагадаць ім, што паседжаньне Сойму — не спэктакль.

Паводле разьлікаў, праект новай АЭС будзе каштаваць каля 17 мільярдаў літаў (6,2 мільярдаў даляраў). Літва мае выдзеліць на гэты праект 6 мільярдаў літаў. Пабудову станцыі плянуецца пачаць у 2015 годзе. Плянаваны пачатак вытворчасьці электрычнасьці — 2020 год. Чакаецца, што праект пабудовы АЭС створыць 6 тысячаў новых працоўных месцаў.

У сувязі з тым, што Літва да 2020 году мае далучыцца да заходнеэўрапейскіх электрасетак, міністар энэргетыкі Літвы Арвідас Сякмокас зазначыў, што без сваёй вытворчасьці энэргіі і пры сфармаваньні дэфіцытнага рынку Літве можа і не ўдацца ажыцьцявіць гэтыя пляны.

У дамове аб канцэсіі Вісагінскай АЭС вызначана, што Літве будзе належаць 38 працэнтаў акцыяў, стратэгічнаму інвэстару — 20, латвійскай фірме Latvenergo — 20, эстонскай Eesti Energia — 22 працэнты.

Дамова аб канцэсіі можа быць падпісана да 28 чэрвеня. Калі дамова будзе падпісаная, праектныя працы працягнуцца. Канчатковае рашэньне аб інвэставаньні мае быць прынятае да 31 сакавіка 2015 году.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG