Косаўскія парлямэнтары прынялі сёньня прысягу – праз два месяцы пасьля агульных выбараў. Дэпутаты абралі часовага прэзыдэнта Косава Якупа Красьнічы сьпікерам парлямэнту.
Найвышэйшы заканадаўчы орган Косава блізкім часам выбера наступных прэзыдэнта і прэм’ер-міністра. Як чакаецца, цяперашні прэм’ер-міністар Хашым Тачы захавае сваю пасаду. Кааліцыя Тачы мае намер вылучыць свайго асноўнага саюзьніка Бэджэта Паколі на пасаду прэзыдэнта.
Пасьля таго, як у лютым 2008 году Косава абвясьціла аб сваёй незалежнасьці ад Сэрбіі, новую краіну прызналі больш як 70 дзяржаваў сьвету.