Лінкі ўнівэрсальнага доступу

«Малады фронт» зьвярнуўся да «Міжнароднай Амністыі»


У міжнародную арганізацыю дасланы зварот з заклікам прызнаць Зьмітра Дашкевіча і Эдуарда Лобава вязьнямі сумленьня. На гэтым тыдні такі статус быў прысвоены намесьніцы старшыні «Маладога фронту» Насьце Палажанцы.

«Зьміцер Дашкевіч і Эдуард Лобаў былі скрадзеныя невядомымі людзьмі наўпрост на вуліцы. Суткі пра іх месцазнаходжаньне не было анічога вядома, і толькі пасьля пададзеных заяваў аб іх выкраданьні міліцыя распаўсюдзіла заяву пра затрыманьне хлопцаў. Па інфармацыі міліцыі, іх затрымалі за зьбіцьцё невядомых людзей кулакамі і мэталічнымі абцугамі. На Дашкевіча і Лобава завялі крымінальную справу па ч.3 арт. 339 КК — асабліва злоснае хуліганства. Ім пагражае ад 3 да 10 год зьняволеньня. Па нашай інфармацыі, у дачыненьні да лідэраў „Маладога фронту“ была зьдзейсьнена правакацыя з мэтаю прадухіліць іхні ўдзел у мірнай акцыі пратэсту 19 сьнежня і ізаляваць апазыцыянэраў ад далейшай актыўнай дзейнасьці.

Завядзеньне крымінальнай справы па „бытавым“, не „палітычным“ артыкуле, што зьяўляецца вядомым яшчэ з савецкіх часоў хітрым крокам спэцслужбаў, скіравана на адцягненьне ўвагі міжнародных арганізацый ад лёсу абвінавачаных. Ня так даўно мы бачылі падобны прыклад у дачыненьні да беларускага прадпрымальніка Мікалая Аўтуховіча, да якога праваабарончыя арганізацыі ставіліся зь перасьцярогаю і недаверам. Як вынік — нават заангажаваны беларускі суд зьняў самыя сур’ёзныя абвінавачаньні з Аўтуховіча, але прадпрымальнік, застаўшыся без міжнароднай падтрымкі, быў пакараны вялікім тэрмінам зьняволеньня. Не дазваляйце беларускім уладам падмануць вас!

Зьміцер Дашкевіч — вядомы беларускі апазыцыянэр, які быў прызнаны вязьнем сумленьня па сваёй ранейшай крымінальнай справе аб удзеле ў арганізацыі. Аўтарытэт Дашкевіча як аднаго зь лідэраў хрысьціянска-дэмакратычных сілаў Беларусі бясспрэчны. Эдуард Лобаў таксама неаднаразова праяўляў сябе як шчыры, мужны і сумленны чалавек.

Не пакідайце лёсу нашых паплечнікаў без увагі, не давайце рэжыму распраўляцца зь беларускімі дэмакратамі зь ціхай згоды міжнародных праваабарончых арганізацый!»
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG