НА ДВАРЭ:
На пачатак лістапада – цёпла, ад 6 да 13 цяпла, у Берасьцейскай вобласьці – да 15.
СЁНЬНЯ – ЎСІХ СЬВЯТЫХ:
Асьвячэньне Кальварыйскіх могілак у Менску, на працягу дня – імшы і працэсіі на могілках.
ТАМ, ДЗЕ НАС НЯМА:
У Жэнэве заснавальнік арганізацыі Wikileaks Джуліян Эсэндж зьбірае прэсавую канфэрэнцыю. Арганізацыя час ад часу абнародуе скандальныя сакрэтныя дакумэнты.
ТАКСАМА Ў ГЭТЫ ДЗЕНЬ:
1911. Аэраплян упершыню ў гісторыі скінуў бомбу з паветра. Гэта зрабілі італьянцы у вайне з туркамі.
1937. У Курапатах карнікі НКВД расстралялі 11 біскупаў, сьвятароў і дыяканаў Беларускай аўтакефальнай праваслаўнай царквы.
1993. Набыла моц Маастрыхцкая дамова, якая паклала афіцыйны пачатак Эўрапейскага Зьвязу.
ЁСЬЦЬ НАГОДА:
Сусьветны дзень вэгана. (Вэганы – строгія вэгетарыянцы, яны ня толькі не ядуць мяса, рыбы, яек, малака і іншых прадуктаў жывёльнага паходжаньня, але й ня носяць таксама адзеньня і абутку са скуры, воўны, футра.)
МІНУС 365:
Год таму на сайце “Свабоды”: “Польскі памежны верталёт упаў у Беларусі”
ЦЫТАТА НА ПАМЯЦЬ:
Калі ад Пакроў да Ўсіх Сьвятых краты зямлю точаць, то зіма будзе сьнежная і марозная – народная прыкмета.
