Лінкі ўнівэрсальнага доступу

У затрыманай на Дзень волі актывісткі такі не знайшлі складу злачынства


Таіса Кабанчук
Бабруйскі гарадскі суд 31 жніўня паўторна разгледзеў справу па абвінавачаньні кіраўніцы Магілёўскай абласной арганізацыі БХД Таісы Кабанчук у супраціве міліцыянтам пры затрыманьні 25 сакавіка.

Пасьля двух з паловай гадзінаў разгляду і выступленьня васьмі сведак судзьдзя пастанавіла закрыць справу дзеля адсутнасьці складу злачынства.

Таіса Кабанчук: «Судзьдзя намагалася даведацца, на якой падставе міліцыянты Мінін і Шкрадзюк, якія мяне затрымлівалі, падрыхтавалі рапарт аб тым, што я аказвала супраціў. Аднак яны не здолелі гэтага растлумачыць. Я мяркую, што судзьдзя вымушана была вынесьці справядлівы вырак, бо, па-першае, справа была яўна „шытая белымі ніткамі“. А па-другое, напярэдадні выбараў улады, напэўна, ня хочуць даваць нагоду нэгатыўна ацэньваць іх дзеяньні».

Таісу Кабанчук затрымалі 25 сакавіка на бабруйскім чыгуначным вакзале, калі яна зьбіралася сесьці ў цягнік на Менск, каб удзельнічаць у сьвяткаваньні Дня Волі. Жанчына паведаміла, што міліцыянты пашкодзілі ёй руку і зламалі акуляры. Яны тлумачылі, што нібыта маюць інфармацыю, паводле якой Таіса перавозіць наркотыкі. У пастарунку міліцыі пасьля перагляду рэчаў на Таісу Кабанчук склалі пратакол за непадпарадкаваньне міліцыянтам. Яе хацелі судзіць у дзень затрыманьня, але жанчына запатрабавала адваката. Таіса заявіла, што яе затрымалі выключна з палітычных меркаваньняў.

Прызначаны на 31 сакавіка суд быў перанесены.

Пазьней Кабанчук паведамілі, што Бабруйскі суд разгледзеў справу пра супраціў міліцыянтам і прызнаў яе вінаватай, але вырашыў не караць. То бок справа была разгледжаная без прысутнасьці абвінавачанай. Таісія Кабанчук падала з гэтай нагоды скаргу ў пракуратуру. Цяпер Бабруйскі суд быў вымушаны разгледзець справу наноў, паведамляе прэсавая служба БХД.
XS
SM
MD
LG