Зянон Пазьняк

Паперад усім вялікі дзякуй Вам!
Ці маеце Вы адносіны да блёгу zianon-pazniak.livejournal.com?

Ня ведаю, што гэта такое, і нават па вашым адрасе не палічыў патрэбным цікавіцца. Сеціва – гэта ня толькі добрая інфармацыя, але і клаака дрэні. Мне шкада часу ва ўсім капацца. Мой карабель плыве і вецер у ветразях вее.

Дзе можна прачытаць аб Вашых дасьледваннях па археалогіі і архітэктуры старога Менску? Ці не ўдзельнічалі Вы ў раскопках подмуркаў былога кляштара ля касьцёлу на пл. Свабоды?

Якія месцы ў Менску і ўвогуле на Беларусі Вам асабліва дарагія?
Жадаю посьпехаў і здароўя!

Ня толькі ўдзельнічаў, але і распачынаў (у 1978 г., разам з Валянцінам Собалем) першыя раскопкі Верхняга Горада, Траецкага прадмесьця, Новага месца, падмуркаў кляштара Бенедыктынак, Дамініканскага, Бэрнардынаў, Езуітаў, Сьвятадухаўскай царквы, ратушы і г.д. У той час акрамя артыкулаў я пасьпеў выдаць папулярную кніжку пра Менск (“Рэха даўнага часу”, Мн. 1985, zianonpazniak.de), дзе напісана пра раскопкі. (Дарэчы, гэта былі першыя ў Беларусі археалягічныя дасьледаваньні пластоў 17-19 ст. Да гэтага ў савецкай белархеалёгіі з сярэднявечнага пэрыяду дасьледвалі толькі пласты 11-13 ст.ст. і называлі гэта фантомнай назвай “древнерусский период”. Пласты Вялікага Княства і пазьнейшыя ішлі ў адвал (зьнішчаліся). Фактычна, мы з В. Собалем першымі пачалі дасьледаваць гэты пазьнейшы Менск.

Pan Zianon, vitajem. Cikava daviedacca na vaspana staŭlieńnie da bielaruskaj lacinki. Jak časta karystajeciesia ź jaje, jakim bačycie jejnuju budučyniu? Zdaroviejka panu! Žyvie Bielarusia! LJ-user nicolaev, coipish, rejka

З усіх так званых “фанэмных” шрыфтоў лацінка самая дасканалая, адэкватная, збалянсаваная, эканамічная, графічна і эстэтычна гнуткая і вельмі багатая (гэта значыць -- варыянтная і разнастайная). Па ўсіх гэтых крытэрыях лацінскі шрыфт ёсьць дасканаласьць, шэдэўр графічнай творчасьці. Беларускія выданьні часта выходзілі на двух шрыфтах адначасна (тыповы прыклад – “Наша Ніва”). У 1912 годзе “Наша Ніва” правяла ўсебеларускае апытаньне (“Рэфэрэндум”). Бальшыня выказалася за кірыліцу. Гэтае рашэньне тады было разумнае, своечасовае і правільнае, паспрыяла адзінству нацыі.
Трэба ўсьведамляць, што кірылічнае напісаньне ёсьць старажытная базавая аснова нашай пісьменна-графічнай культуры, якая аказала ўплыў на ўвесь суседні”кірылічны сьвет”. Гэта наша ўкарэненая, пазнавальная традцыя – Літоўкая Мэтрыка нашай беларускай фэнамэнальнасьці.
Беларуская лацінка як дасканалая частка нашай пісьменна-графічнай культуры павінна, на мой погляд, вывучацца ў беларускай вышэйшай школе. Кожны адукаваны беларус павінен ведаць два беларускія шрыфты, каб мець доступ да ўсёй беларускай культурнай рэчаіснасьці. Неафіцыйнае ўжываньне лацінкі ў нашай культурнай традыцыі – гэта справа хаценьня.
Я ўжываю беларускую лацінку ўсё жыцьцё і даволі часта ў прыватных запісах і перапісцы. Не выключаю яе публічнага ўжываньня. Агонь нашай багатай беларускай культуры павінен гарэць вечна.

Зянон Станіслававіч, у кнізе Малы Кансьпіратар (Варшава, 1983) напісана, што «Самаахвяраванне і праца на грамадскіх пачатках - гэта жахі камунізму […] За добра зробленую працу трэба добра плаціць. Камуністы знічтожылі культуру працы шляхам недаплаты […]. Нашыя незалежныя самаўпраўляемыя фірмы не могуць сабе гэтага дазволіць. Патрэбна цвёрда плаціць столькі, каб нашы кааперанты маглі нармальна жыць. Сарамлівыя адносіны да грошаў («не дзеля грошаў працуем у падпольі») з’яўляецца лішняй прытворнай сарамлівасцю». Як Вы ставіцеся да такога падыходу, чаму ён адкідаецца сярод сяброў Партыі і Фронта? Ці былі за апошнія 5 гадоў спробы наладзіць беларускае фінансаваньне беларускай справы (а не з замежных фондаў і з дапамогай грантаў - тут пазыцыя вядомая) і чым гэта скончылася? Ці ня лічыце, што адмова ад такіх мэтадаў працы ў значнай меры абумовіла падзел Фронта ў 99-ым і прывяла да таго, што нейкая частка беларусаў увогуле працуе за замежныя грошы з усімі дэструктыўнымі наступствамі, якія ўсе мы бачым сёньня? Дзякуй.

Цытата, якую Вы прыслалі, выбрана вельмі няўдала. Тое, што Вы цытуеце, мог напісаць поўны прафан.
Грамадзкая праца (чытай – і грамадзка-палітычная) -- гэта такая дзейнасьць, якой людзі добраахвотна аддаюць свой вольны (альбо магчымы) час. Гэтая індывідуальная праца не аплочваецца як зарплата. Грошы тут патрэбны толькі на арганізацыю і ўладкаваньне самой грамадзка-палітычнай працы і яе мерапрыемстваў. Індывідуальную аплату (па дамоўленасьці і па статуту( тут могуць атрымліваць у нармальных умовах толькі асобныя катэгорыі тэхнічнага і іншага пэрсаналу, альбо ў іншых умовах – па дамоўленасьці некаторыя асобы, то часова выконваюць спэцыяльную функцыю. Гэтакі прынцып дзейнічае паўсюдна ў дэмакратычных арганізацыях у дэмакратычным сьвеце і зьяўляецца натуральным і аптымальным падыходам.
Адыход ад гэтага прынцыпу можа мець розныя нэгатыўныя наступствы, у тым ліку і стаць прычынай распаду грамадзка-палітычнай арганізацыі.
Для інфармацыі: у БНФ у першай палове 1990-х было чатыры штатныя “бюракраты” (улічваючы прыбіральшчыцу). Усе фінансавыя паступленьні і расходы маглі ісьці толькі за подпісам старшыні і бухгалтара. Уся фінансавая дзейнасьць правяралася рэвізійнай камісіяй, якая складала справаздачу перад Зьездам.
Грамадзка-палітычная арганізацыя, у якой няма жорсткіх фінансавых правілаў і фінансавай дысцыпліны, доўга не праіснуе.
Тое, што здарылася ў Фронце пасьля майго вымушанага ад’езду – гэта парушэньне ўсіх прынцыпаў і дзейнасьць па правілу “грошы ня пахнуць”. Але ў сапраўднасьці, - аказваецца, яны ня толькі пахнуць, але й сьмярдзяць. (Успомніце лапідарныя выказваньні прагматыкаў з БНФ пасьля маёй вымушанай эміграцыі: “Пазьняк не даваў зарабляць бабкі”. Раскол Фронту прагматыкамі – гэта павучальная лекцыя шмат для каго).
У дэмакратычных краінах (асабліва ў ЗША, на выбарчую кампанію, напрыклад), партыі зьбіраюць шматмільённыя сумы. Але ніхто ня плоціць індывідуальна валанцёрам, прыхільнікам і тым больш сябрам партыі.
Дзікія фінансавыя адносіны, якія завяла падстаўная апазыцыя, прыйшлі з дзікай у гэтым сэнсе Расеі, дзе нават галасы дэпутатаў парлямэнту – Думы – купляюць за грошы.

Прывітаньне, Зянон Станіслававіч. Вы ўжо выказваліся пра «неабходнасьць падрыхтаваць абгрунтаваньне няўдзелу беларусаў у чарговых выбарах рэжыму (размова ідзе пра байкот)», таму ў гэтым рэчышчы паўтару сваё пытаньне, якое ўжо задаваў спадару Беленькаму на канфэрэнцыі РС 24.10.2007, але тады я нажаль не пачуў ці не зразумеў на яго адказа. як Вы ставіецся да байкоту з рэгістрацыяй і здыманьнем кандыдатаў? Справа ў тым, што ня ўсе палітычныя сілы можна пераканаць (колькі б прыкладаў з канфіскацыяй улётак зарэгістраванага Вячоркі на мясцовых выбараў не прыводзіць) у тым, што ў прынцыпе рэгістрацыя фактычна нічога не дае… Але шмат хто станоўча ставіцца да ідэі актыўнага байкоту і яны мяркуюць што рэгістрацыя кандыдатаў можа дапамагчы распаўсюджваньню матэрыялаў аб байкоце. Лёгіка безумоўна тут ёсьць. Дык вось пытаньне: калі ва ўлётках і заявах зарэгістраваных кандыдатаў будзе адразу прапісана "байкот", калі яны адразу будуць казаць пра сваё зьняцьцё яшчэ да пачатку датэрміновага галасаваньня - ці будзе гэта шкодным і ці павінна жорстка крытыкавацца і чаму?

Паважаны Ўладзімер, магчыма, Вы вельмі малады, што не задумаліся прыслаць мне такую нягеглую прапанову. Калі б Вы падумалі, дык, відаць, не прыслалі б. Ну хто гэта ходзіць на выбары, каб агітаваць выбаршчыкаў і адначасна казаць ім аб зьняцьці сваёй кандыдатуры? Ня трэба прымаць людзей за ідыётаў. Гэта нагадвае мне стары, стогадовы анэкдот (вельмі беларускі). Чарнасоценцы пачалі арганізоўваць габрэйкі пагром і кажуць мужыку: “Пайшлі!”. Навошта спрачацца з “Союзом русского народа”, падумаў мужык і згадзіўся. Аде тут жа пабег у карчму і кажа: “Ты, брат Іцка, схавайся. Мы заўтра цябе граміць прыйдзем”. Прапанова, апісаная Ўлазімерам, нагадвае паводзіны гэтага мужыка.

Сотні сьвядомых Беларусаў вымушаны былі зьехаць з краіны. Ці можна гэта назваць сучаснымі Курапатамі?
Ці настаў час абьядноўваць палітычную эміграцыю якая не ведае іншага палітыка акрамя Пазьняка?
Зянон Станіслававіч, як Вы лічыце, ці магчыма, што пад час выбараў адбудзецца чарговы ганебны рэферэндум і сёньняшнія штатныя апазыцыянеры зноў будуць выступаць ў якасьці загоншчыкаў?
Дзякуй Богу, што Вы ёсьць!
Жыве Беларусь!

Загоншчыкамі яны могуць перастаць быць толькі пры адной умове: калі ні Захад, ні Масква не дадуць грошай на выбары. Але такога ня будзе, бо кожны з гэтых бакоў па-свойму зацікаўлены ў выбарах на Беларусі.

Шаноўны Зянон Станіслававіч,беражы вас Бог за ўсё тое што вы зрабілі дзеля нашай Бацькаўшчыны.Ёсьць 2 пытаньня.Калі вернецеся на Радзіму,што найперш зробіце,вашыя пляны?Якая з партый вам найбольш здаецца дзеязьдольнай(БХК,МФ,ОГП і г.д)?

Дзякуй за добрае зычэньне. Як вярнуся (а вярнуся абавязкова) – тады і пабачыце. З усіх беларускіх партыяў мне найбольш падабаецца Кансэрватыўна-Хрысьціянская партыя – БНФ.

Скажите, Зенон Станиславович, а как мне можно попасть в ваш антижидобинский список? Заявление написать на ваше имя или что? Хочется, знаете ли, быть рядом с лучшими людьми Белоруссии

Дашліце сваю фатаграфію, копію мэтрыкі (сканэр), працоўнай кніжкі і аўтабіяграфію. (А то невядома, хто Вы ёсьць, хоць , кажуць, што ў Сеціве Вы ўсім надакучылі).

Шаноўны Зянон Станіслававіч, што трэба рабіць з сотнямі тысячаў адстаўных асаднікаў савецкай арміі і КГБ, якія камфортна жывуць у Беларусі і не хаваюць сваёй антыбеларускай пазыцыі, пасьля адбудовы незалежнай дэмакратычнай Беларусі? Міхась

Пры зьмене ўлады на дэмакратычную і беларускую “асаднікам” застанецца добры выбар: ляяльнасьць да беларускай дзяржавы і культуры. Яны, у бальшыні, яго і зробяць. У каго ня хопіць розуму гэта зрабіць, той можа ўскладніць сабе жыцьцё па ўласнай дурасьці.

Паважаны Зянон!
Вы сделали большую работу для Беларуси по возвращении стране Независимости. Вам обязательно будет поставлен памятник где-нибудь во дворике Дома Правительства как символа Адраджэння Беларуси.
Планируете ли Вы возвращение в Беларусь в этом году?
Только сам факт анонсирования Вашего приезда в Беларусь собрал бы десятки тысяч людей на площади. Убежден, что если бы Вы были 19 марта 2006 года в Минске, то режим был бы свергнут. Но Милинкевич и компания получили иной приказ выводить людей от центра города.
Когда Вы прогнозируете новую ситуацию выхода людей на улицы и готовы ли вы будете возглавить победную акцию протеста?
Жыве Беларусь!

Уж очень странен мне
Ваш стиль и слог,
И мысли бренные,
Сямён.
Пройдут года
И во дворе,
Как шпак весенний
На заре,
Где Дом Правительства,
Сквозь сон,
Продрав глаза,
Поправ закон,
Вас встретит
Гипсовый Зянон.
Паважаны Сямён, за вершык не крыўдуйце, але пішыце што-небудзь сэнсоўнае, каб можна было адказаць.

Почему БНФ никогда не придумывает и не использует неординарные акции протеста и нестандартные места их проведения? Дайте комментарий по каждому из примеров.
Первый вариант, можно 3 июля во время парада консервных банок и холодильников призвать оппозиционного настроенных граждан смешаться с толпой и в нужный момент развернуть свои требования. Эффект был бы поразительный. Именно так пал режим Чаушеску.
Второй вариант, совместить празднование Нового года с призывом выхода под политическими лозунгами. На Новый год в центре Минска всегда выходит в центр города сотни тысяч человек. Можно выйти с лозунгом «В новый год с новой властью».
Третий вариант, анонсировать проведение акции протеста на Привокзальной площади Минска. Это приведет к тому, что будет порализовано половина транспортных коммуникаций города. Кстати, этот вариант самый эффективный в том случае, если Зенон Позняк решит вернуться на поезде и прибыть в Минск на вокзал.

Уважаемый "Иля". Думаю, все Ваши хорошие варианты преждевременны. Нам необходимо сначала забрать Дарданеллы. И если только Вы скооперируетесь с господином Семёном, господином Иваном и господином Костасом, тогда, как в песне поётся – “нет таких крепостей, которых не могли бы взять большевики”.

Почему Вы не встречаетесь с лидерами Европы, США, России и т.д.?
Вот Милинкевич умудряется делать встречи за встречами, а Вы нет. С чем это связано?
Как Вы оцениваете фигуру Милинкевича как политика? Сможет ли он стать президентом?

Мілінкевіч прэзыдэнтам стаць ня зможа, бо ня хоча. Яму напісана іншая роля, якую ён ужо выканаў.

Изменилось ли Ваше мнение по поводу Козулина? Как Вы считаете сможет ли Козулин стать президентом?

Казулін не мяняецца. І ў прынцыпе, ужо ня зьменіцца. Пахаваньне яго мілай, без пары памерлай жонкі паказала, што ён нічога не зразумеў, што зь ім адбылося. Па-чалавечы яго шкода, і я яму спачуваю, але бліжэйшы лёс яго марны. Ягоны прыклад іншым навука (хто мае хоць трохі здольнасьці вучыцца), як ня трэба гуляцца з КГБ (ФСБ) і бавіцца з Масквой.

Спадар Зянон! скажыце калі ласка аб плянах правядзеньня чарговага зьезду партыі.

Па Вашым пытаньні, спадар Мікола, я адразу зразумеў, што Вы вельмі разумны чалавек.

На какие источники финансирования существует партия и вы лично ?

Партыя існуе на партыйныя сродкі, якія ахвяруюць для партыі яе члены. Я “лично“ існую разам з сям’ёй на сродкі, якія зарабляем мы з жонкай.

Знаете ли вы о том, что на значительных белорусских интернет-ресурсах от вашего имени и от имени КХП-БНФ вещает некая группа лиц. Зачастую в крайне глупом, резком и оскорбительном тоне, что служит причиной крайне создания крайне негативного мнения о вас и вашей партии ?
Это ваши "засланцы" ?

На жаль, пра гэта ня ведаю.

добрый день! Как Вы относитесь к геям? Будут ли разрешены однополые браки в Беларуси если Вы станете президентом?

Пакуль што гэтае пытаньне для Беларусі цалкам маргінальнае. Але, улічваючы, што маральны рэгрэс у сьвеце (прынамсі ў бліжэйшым часе) яшчэ будзе доўжыцца, дык, мяркую, трэба прыняць заканадаўчае палажэньне аб ахове чалавечай тоеснасьці і аб злачынстве супраць чалавечай прыроды. Прапаганда гомасэксуалізму і іншай збочанасці людзкай істоты будзе пастаўленая па-за законам.

Паважаны Зянон Станіслававіч,

як пазбавіцца ад псэўдаапазіцыі?

Стварыць праўдзівую.

Добры дзень, шаноўны Зянон Станіслававіч. Вялікае дзякуй за ўсё, што Вы зрабілі і робіце для нашай Бацькаўшчыны.

Скажыце, калі ласка:
1. На Вашу думку, калі адбудуцца перамены ў Беларусі? Што стане іх перадумоваю? Што самае галоўнае цяпер для Грамадзянаў, а што другаснае?
2. Якім Вам прадбачыцца Беларускае будачае?
3. Хто для Вас узоры ў палітыцы, жыцьці?
4. Хто зрабіў на Вас найбольшы ўплыў? Я маю на увазе і жывых людзей і асобаў мінулага.
5. Якое месца ў Вашым жыцьці займае мастацкая творчасьць?
6. З чаго і з каго пачаўся паэт Зянон?
7. Што блізка Вам з нашай нацыянальнай і замежнай літаратуры?

З павагай, Георгій

Паважаны Георгій, дзякуй за добрае слова і прыхільную настроенасьць Прызнацца, аднак, мне цяжка адказваць на пытаньні, пабудаваныя па прынцыпу жаўцізны. І нават не таму, што сапраўды цяжка, але ад усьведамленьня іх поўнай непатрэбшчыны. Мяркую, і для Вас самога -- таксама. І сапраўды: “з каго пачаўся паэт Зянон?” Або я ведаю? Ці “Як Вам прадбачыцца будучыня?”. А хто ж гэта ведае? Дарагі дружа, збаўце мяне ад адказу на такія пытаньні і не крыўдуйце, ды пазьбягайце чытаньня сучасных газэт.

Паважаны Зянон Станіслававіч,

як зрабіць для простых беларусаў больш зразумелым "сэнс ды спосаб нацыянальнага змаганьня". Прывядзіце, калі ласка, прыклады.

Праблема ў тым, што адпаведна са сваім жуцьцёвым розумам многія прыхільныя беларусы тлумачаць на прыклад зьнішчэньне беларускай школы не палітыкай русіфікацыйнага рэжыма, а банальнай адсутнасьцю грошай на беларускую школку...

Гэта ня “простыя беларусы” так тлумачаць, гэта ім так растлумачылі іхныя нішчыцелі. “Сэнс і спосаб нацыянальнага змаганьня” не патрэбны людзям, якія ня хочуць абараняць сябе. З сябе трэба і пачынаць, з сваёй хаты, агарода, зямлі, здароўя, дрэва, суседа, вуліцы, горада, паветра і г.д. Людзям, якія не супраціўляліся нішчэньню краю, меліярацыі, спрастаньню рэк, высяленьню з “непэрспэктыўных” вёсак і г.д. -- лепш не дурыце мазгі “сэнсам і спосабам”. Пачніце ад усьведамленьня неабходнасьці абараняць сябе, сваё асяродзьдзе. Нават зьвер пазначае і бароніць сваю тэрыторыю.