Лінкі ўнівэрсальнага доступу

Сьвятыня паміж сьметнікам і палігонам. Актывісты ўшанавалі памяць беларускамоўнага ксяндза Вінцэнта Гадлеўскага


Каля крыжа Вінцэнту Гадлеўскаму ўшанавалі ягоную памяць
пачакайце

No media source currently available

0:00 0:01:35 0:00

Актывісты руху салідарнасьці «Разам» 24 сьнежня наведалі ўрочышча Благаўшчына каля вёскі Вялікі Трасьцянец, дзе ўшанавалі памяць каталіцкага сьвятара Вінцэнта Гадлеўскага. Удзел у імпрэзе ўзялі актывісты руху: Вячаслаў Сіўчык, Аляксандар Макаеў, бард і паэт Зьміцер Захарэвіч, скульптар Алесь Цыркуноў — усяго каля дзесяці чалавек.

Каля крыжа Вінцэнту Гадлеўскаму яны разгарнулі бел-чырвона-белыя сьцягі, завязалі на крыжы бел-чырвона-белыя стужкі, запалілі зьнічы. Перад пачаткам ўдзельнікі прачыталі малітву.

Каталіцкі сьвятар Вінцэнт Гадлеўскі, адзін з заснавальнікаў Беларускай хрысьціянскай дэмакратыі і ідэоляг беларускага нацыяналізму
Каталіцкі сьвятар Вінцэнт Гадлеўскі, адзін з заснавальнікаў Беларускай хрысьціянскай дэмакратыі і ідэоляг беларускага нацыяналізму

Лідэр руху салідарнасьці «Разам» Вячаслаў Сіўчык, прамаўляючы да прысутных, нагадаў пра значнасьць асобы Вінцэнта Гадлеўскага, ягоны ўнёсак у разьвіцьцё беларускага дэмакратычнага руху, у станаўленьне беларускага касьцёлу, у папулярызацыю беларускай мовы. Таксама нагадаў гісторыю адкрыцьця імені Вінцэнта Гадлеўскага як значнай асобы і высьвятленьня ягонага месца гібелі, гісторыю ўсталяваньня крыжа ў ягоную памяць, аўтарам якога быў прысутны на імпрэзе Алесь Цыркуноў. У прыватнасьці Вячаслаў Сіўчык адзначыў:

«Усё сваё жыцьцё айцец Вінцэнт Гадлеўскі аддаў Беларусі. Ён быў вельмі вядомым яшчэ да вайны: быў удзельнікам Усебеларускага кангрэсу ў 1917 годзе, якім у выніку была абвешчаная Беларуская Народная Рэспубліка. Ён быў вядомым сьвятаром і асьветнікам, ягоны асаблівы палітычны талент выявіўся падчас Другой усясьветнай вайны, калі ён стварыў моцнае беларускае падпольле. Вінцэнт Гадлеўскі сваёй дзейнасьцю падкрэсьліваў, што няма будучыні ў Беларусі за таталітарызмам. У тых неверагодна цяжкіх умовах ён адбудоўваў сваю беларускую дзяржаву, каб беларусы мелі рэлігійныя і агульначалавечыя правы».

Ушанаваньне памяці Вінцэнта Гадлеўскага стала традыцыйнай акцыяй памяці каталіцкага сьвятара, заснавальніка беларускага хрысьціянска-дэмакратычнага руху. Праводзяць яе штогод у дзень гібелі ксяндза 24 сьнежня.

У 1942 годзе сьвятара арыштавалі нацысты і затым расстралялі ва ўрочышчы Благаўшчына. У савецкі час на гэтым месцы зрабілі агульнагарадзкі сьметнік. Першая акцыя памяці Вінцэнта Гадлеўскага адбылася ў 2006 годзе.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG