Заяўнікам Чарнобыльскага шляху, якіх 17 красавіка выклікалі ў Менгарвыканкам, прадстаўнікі ўладаў паведамілі, што акцыя дазваляецца.
Збор удзельнікаў акцыі пачнецца а 14-й гадзіне 26 красавіка каля кінатэатру «Кастрычнік». Шэсьце пройдзе з 14:30 да 16 гадзіны да памятнага знаку «Ахвярам Чарнобыля» на вуліцы Ліліі Карастаянавай.
«Гэта фактычна той фармат, які мы замаўлялі», — сказаў карэспандэнту Свабоды старшыня Партыі БНФ Аляксей Янукевіч:
«Менгарвыканкам толькі скараціў час збору і павялічыў на такі ж самы час працягласьць дэманстрацыі. Мы ня лічым, што гэта прынцыповая зьмена, таму збольшага той дазвол адпавядае заяўленаму фармату акцыі. Час збору скарочаны на паўгадзіны. Мы закладалі збор цягам гадзіны і дэманстрацыю — гадзіну. Менгарвыканкам дазволіў паўгадзіны на збор і паўтары гадзіны на дэманстрацыю. Яны патлумачылі, што, на іхнюю думку, з улікам досьведу 25 сакавіка збор, які працягваецца гадзіну, ператвараецца ў асобнае мерапрыемства. А шэсьце да вуліцы Ліліі Карастаянавай, маўляў, у гадзіну ня можа ўкласьціся. Таму яны зрабілі такую зьмену».
На наступным тыдні заяўнікі сустрэнуцца з прадстаўнікамі менскай міліцыі, каб абмеркаваць тэхнічныя дэталі шэсьця. Таксама будзе заключаная дамова з прадстаўнікамі міліцыі і хуткай дапамогі.
«Традыцыйна ў Менгарвыканкаме зьвярнулі ўвагу на недапушчальнасьць выкарыстаньня незарэгістраванай сымболікі, асабліва сымболікі незарэгістраваных арганізацыяў. Іншых канкрэтных нараканьняў па сымболіцы не прагучала. Што тычыцца лёзунгаў і транспарантаў, нам сказалі пра звароты грамадзянаў, якія нібыта паступалі. Маўляў, некаторыя лёзунгі на 25 сакавіка некаторым грамадзянам падаліся абразьлівымі і супрацьзаконнымі. Прасілі перад гэтым мерапрыемствам таксама зьмест лёзунгаў вытрымліваць у адпаведнасьці з заканадаўствам. Мы сказалі, што заўсёды так робім», — адзначыў Аляксей Янукевіч.
Арганізатары жалобнай маніфэстацыі да ўгодкаў аварыі на ЧАЭС правядуць сёлета толькі шэсьце — ад мітынгу яны адмовіліся.
Пад заяўкай падпісаліся Юрась Губарэвіч ад руху «За свабоду», Аляксей Янукевіч ад Партыі БНФ, Віталь Рымашэўскі ад аргкамітэту па стварэньні партыі «Беларуская хрысьціянская дэмакратыя», Ільля Дабратвор з руху салідарнасьці «Разам» і Дзьмітры Кучук зь Беларускай партыі «Зялёныя».
Сёлета шэсьце пройдзе пад лёзунгам «Не расейскай ядзернай пагрозе!».
