Украіна рыхтуецца абараняць сваю свабоду, дэмакратыю і незалежнасьць, заявіў украінскі прэзыдэнт Пятро Парашэнка падчас сустрэчы з кангрэсмэнамі ЗША ў Кіеве.
«Украіна абараняе ня толькі сваю незалежнасьць, украінскія ваяры абараняюць будучыню ўсёй Эўропы», — сказаў Парашэнка, якога цытуе яго прэсавая служба.
Лідэр большасьці ў Палаце прадстаўнікоў Кангрэсу ЗША Кевін Макарці заявіў, што Ўкраіну падтрымліваюць як рэспубліканцы, гэтак і дэмакраты. Таксама, паводле яго слоў, падтрымка Ўкраіны набывае ўсё большае значэньне ў амэрыканскім грамадзтве.
Падтрымку Ўкраіны выказаў таксама старшыня камітэту ўзброеных сіл Палаты прадстаўнікоў Кангрэсу ЗША Ўільям Торнбэры.
«Мы ўсе падтрымліваем украінцаў у вашай барацьбе за незалежнасьць і свабоду. Расейская агрэсія супраць Украіны закранае кожнага з нас», — сказаў ён.