Паводле раённай пракуратуры, вырак суду набыў юрыдычную моц.
25-гадовая жанчына неаднаразова прыцягвалася да адміністрацыйнай адказнасьці за прастытуцыю, была на ўліку ў нарколяга і ў кабінэце інфэкцыйных захворваньняў. Яе папярэджвалі пра захаваньне падвышаных мераў асьцярожнасьці. Таму жанчыну судзілі па факце наўмыснага пастаўленьня іншай асобы ў небясьпеку заражэньня ВІЧ.
Пацярпелымі па справе праходзілі 4 чалавекі, старэйшаму зь іх — 70 гадоў.
Падрабязнасьці з залі суду не агалошваюцца, паколькі суд праходзіў у закрытым рэжыме.
Раней адзін з пацярпелых апавядаў журналістам пра сустрэчу з маладой асобай: «Пазнаёміўся проста на вуліцы і запрасіў у свой гараж».
У хуткім часе мужчыну давялося расказаць пра ўсё жонцы, бо трэба было праходзіць дасьледаваньне на ВІЧ. Тая апынулася на мяжы нэрвовага зрыву.
Інфікаваная прастытутка апавядала апэратыўнікам, што помсьціла мужчынам — і назвала больш як два дзясяткі імёнаў. Мясцовыя лекары ў зьвязку з выяўленымі эпізодамі «помсты» раілі прайсьці дасьледаваньне на ВІЧ усім жыхарам гораду, якія знаходзяцца ў групе рызыкі.