Паліцыя Партугаліі і супрацоўнікі Эўраполу, паліцыйнага агенцтва ЭЗ, заявілі, што выявілі ўплывовую групоўку расейкай мафіі, якая адмывала грошы праз эўрапейскія футбольныя клюбы.
У заяве Эўраполу, апублікаванай 4 траўня, сьцьвярджаецца, што гэтая групоўка вызначала футбольныя клюбы ЭЗ, якія апынуліся ў цяжкім фінансавым становішчы, падтрымлівала іх ахвяраваньнямі або інвэстыцыямі, а потым, убіўшыся ў давер кіраўніцтва, закупляла клюбы праз падстаўленых асобаў. Пасьля гэтага такія клюбы станавіліся каналамі адмываньня брудных грошай (праз трансфэр гульцоў, кантракты на тэлевізійныя правы і падобнае).
Пракуратура Партугаліі 3 траўня паведаміла, што адбыліся ператрусы ў офісах 22 футбольных клюбаў краіны, у тым ліку лісабонскіх Benfica і Sporting.
Крыніца ў паліцыі паведаміла Reuters, што ў цэнтры расьсьледаваньня знаходзіцца клюб Uniao de Leiria, уладальнікам якога зьяўляецца расейскі бізнэсмэн Аляксандр Толсьцікаў.