Лінкі ўнівэрсальнага доступу

Візавы рэжым з Ізраілем адменяць 27 лістапада


Міністар замежных спраў Беларусі Ўладзімер Макей і міністар абсорбцыі Ізраіля Софа Ландвэр падпісваюць пагадненьне аб адмене візаў для ўладальнікаў нацыянальных пашпартоў. Менск, 19 верасьня 2014 году
Міністар замежных спраў Беларусі Ўладзімер Макей і міністар абсорбцыі Ізраіля Софа Ландвэр падпісваюць пагадненьне аб адмене візаў для ўладальнікаў нацыянальных пашпартоў. Менск, 19 верасьня 2014 году

З гэтага часу кожны беларус, які накіроўваецца ў Ізраіль, можа зэканоміць 23 даляры

Бязьвізавы рэжым паміж Беларусьсю і Ізраілем пачне дзейнічаць ад 27 лістапада 2015 году. Пра гэта сёньня паведаміў на паседжаньні сталай камісіі Палаты прадстаўнікоў па ахове здароўя, фізычнай культуры, сямейнай і моладзевай палітыцы намесьнік міністра спорту і турызму Беларусі Міхаіл Партны:

«Ужо вызначана дата, калі запрацуе бязьвізавы рэжым для грамадзян Беларусі і Ізраіля, гэта 27 лістапада».

Намесьнік міністра заявіў, што бязьвізавы рэжым дазволіць павялічыць колькасьць турыстаў у абедзьве краіны.

Перамовы пра адмену візаў вяліся некалькі гадоў. Тады называліся розныя даты адмены візаў. Так, былы амбасадар Ізраіля ў Беларусі Ёзэф Шагал заяўляў, што беларусы змогуць бязь візаў наведаць Сьвятую зямлю, каб адзначыць Раство Хрыстова 2015 году. А Фаня Кіршэнбаўм — тагачасная намесьніца міністра ўнутраных спраў Ізраіля — наагул казала, што гэтае палажэньне можа запрацаваць яшчэ ў кастрычніку 2014 году.

Урэшце адпаведнае пагадненьне падпісалі ў Менску 19 верасьня 2014 году тагачасны міністар абсорбцыі Ізраіля Софа Ландвэр і міністар замежных спраў Беларусі Ўладзімер Макей.

Працэдуры, неабходныя дзеля таго, каб яно запрацавала, Беларусь выканала цалкам 5 студзеня 2015 году. А вось ізраільскі бок зацягнуў рашэньне праблемы. Гэта было, па-першае, зьвязана з пазыцыяй Міністэрства ўнутраных спраў. Яно непакоілася, што адмена віз можа прывесьці да павелічэньня колькасьці нелегалаў, якія прыбываюць у якасьці турыстаў і застаюцца ў Ізраілі, каб зарабіць. А па-другое, увесну ў краіне праводзіліся датэрміновыя парлямэнцкія выбары. І толькі 16 жніўня новы ўрад прагаласаваў за бязьвізавы рэжым зь Беларусьсю.

У Ізраілі жыве шмат выхадцаў зь Беларусі. Пакуль што і яны, і іхнія сваякі, якія засталіся ў Беларусі, адчуваюць сябе ў дыскрымінаваным становішчы: бязь візаў адзін аднаго не адведаеш. А вось грамадзяне Расеі зь верасьня 2008 году, а затым і Ўкраіны — зь лютага 2011-га карыстаюцца бязьвізавым рэжымам. Сёньня ж беларус, каб наведаць Ізраіль, мусіць набыць візу, якая каштуе 23 даляры. Грамадзянін Ізраіля за беларускую візу мусіць заплаціць даражэй — 60 эўра.

За апошні час Беларусь перайшла на бязьвізавы рэжым з Эквадорам, Турэччынай, Манголіяй, Віетнамам, Інданэзіяй. Вядуцца перамовы яшчэ прыкладна з 15 краінамі сьвету. Сярод іх —Аб’яднаныя Арабскія Эміраты, Сынгапур, Катар, Аман, Лаос...

«На мой погляд, кіраўніцтву Беларусі трэба было б пераарыентавацца ў вызначэньні краін для бязьвізавага рэжыму зь „цікавых“ на карысныя», — кажа палітоляг Алесь Лагвінец:

Алесь Лагвінец
Алесь Лагвінец

«Цікавымі краінамі могуць быць любыя краіны ў сьвеце. А наколькі яны могуць быць карысныя, гэта іншае пытаньне. І наколькі ўсталяваньне бязьвізавага рэжыму зь імі спросьціць жыцьцё беларусам і будзе мець эканамічны эфэкт.

І калі казаць пра зручнасьць і эканамічны эфэкт для беларусаў, то галоўнае для нас — гэта пабудова бязьвізавай прасторы з краінамі Эўрапейскага Зьвязу. На гэта рэжым Лукашэнкі сёньня ня пойдзе. Улады Беларусі хочуць атрымліваць толькі эканамічную выгаду і супрацоўнічаць толькі на сваіх умовах. А гэта ня ўмовы цывілізаваных адносінаў».

На афіцыйным сайце МЗС Беларусі ёсьць сьпіс краін, якія грамадзяне Беларусі цяпер могуць наведваць бязь візаў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG