Лідэр расейскага байк-клюбу «Начныя ваўкі» Аляксандр Залдастанаў, вядомы таксама пад псэўданімам «Хірург», патлумачыў словы свайго калегі Андрэя Баброўскага аб касмэтычцы ў байкераў, якіх абшуквалі на мяжы з Польшчай. Інтэрвію з Залдастанавым апублікавала інтэрнэт-выданьне «Фонтанка».
«Ехалі хлопцы, бралі дзяўчат з сабой. Яны ж ня ехалі адны. У нас было некалькі чалавек, некалькі дам, мабыць, у іх былі з сабой касмэтычкі. Плявузгнуў „Акела“ (псэўданім Баброўскага) пра гэтыя касмэтычкі. А сказаць-та няма чаго — вось і падхапілі», - распавёў Залдастанаў.
Аб касмэтычцы ў байкераў Баброўскі распавёў у інтэрвію тэлеканалу LifeNews 27 красавіка. У гэты дзень калёну байкераў з «Начных ваўкоў», якія зьдзяйсьняюць мотапрабег па Эўропе ў гонар 70-годзьдзя перамогі, не пусьцілі на тэрыторыю Польшчы.
Байкеры спрабавалі перасячы мяжу Беларусі і Польшчы на пераходзе «Брэст — Цярэспаль». Паводле Баброўскага, перад рашэньнем пра нядопуск удзельнікаў мотапрабегу, мытнікі абшуквалі іх некалькі гадзін.
«Аглядалі дасканала, кожную шкарпэтку і касмэтычку, усе асабістыя рэчы, усё рабілі жорстка, хоць і ў рамках закону», — сказаў ён.
Пасьля яго інтэрвію пытаньнем аб тым, навошта байкерам патрэбныя касмэтычкі, задаліся карыстальнікі сацыяльных сетак. Беларускія актывісткі Вольга Мікалайчык і Кацярына Садоўская спрабавалі на знак пратэсту супраць праезду байкераў перадаць амбасадару Расеі Сурыкаву адмысловы «чамадан-касмэтычку» з эмблемай «Начных ваўкоў» і надпісам «Забярыце касмэтычку», якую нібыта забыліся байкеры на мяжы.
Самае папулярнае
1
