Лінкі ўнівэрсальнага доступу

ТОП-5 «боек» у кулюарах беларускай палітыкі


Сёньня ў Вярхоўнай Радзе Ўкраіны Аляксандар Шаўчэнка ўдарыў дэпутата-"радыкала" Алега Ляшко па галаве, адправіўшы палітыка ў накдаўн.

Пазафракцыйны дэпутат Шаўчэнка абвінаваціў Ляшко ў тым, што той празьмерна піярыцца на тэме вайны.

Сьведкамі бойкі сталі дзясяткі тэлекамэраў.

Беларусь таксама мае свае гісторыі кулюарных «боек».

Жырыноўскага спусьцілі зь лесьвіцы

Уладзімер Жырыноўскі
Уладзімер Жырыноўскі

У 1991 у беларускім парлямэнце Ўладзіміра Жырыноўскага спусьцілі зь лесьвіцы. Расейскі палітык зьявіўся ў Менску неўзабаве пасьля абвяшчэньня незалежнасьці. Адбывалася сэсія Вярхоўнага Савету. Апавядае Лявон Баршчэўскі, дэпутат Вярхоўнага Савета ХІІ склікання:

«У часе перапынку чую вэрхал на лесьвіцы каля кабінета апазыцыі, бачу: ляціць Жырыноўскі зьверху і падае мне пад ногі. Пятро Садоўскі і Сяргей Навумчык спусьцілі яго зь лесвіцы». Жырыноўскі прыгразіў вярнуцца на танку і пакараць усіх «жыдоў і палякаў», што развальваюць вялікую краіну.

Аплявалі Ціхіню

Каардынатар Апазыцыі БНФ Сяргей Навумчык і сакратар ЦК КПБ Валеры Ціхіня на сэсіі ВС БССР. Чэрвень 1991 г.
Каардынатар Апазыцыі БНФ Сяргей Навумчык і сакратар ЦК КПБ Валеры Ціхіня на сэсіі ВС БССР. Чэрвень 1991 г.

У той жа год, як мяркуецца, 25 жніўня пацярпеў дэпутат і сакратар ЦК КПБ Валеры Ціхіня. Як піша Зянон Пазьняк, «калі Ціхіня ішоў у Вярхоўны Савет, на яго кінуліся нястрыманыя людзі, каб адлупіць, але дружыньнікі Фронту, стаўшы ланцугом і ўзяўшыся за рукі, не дапусьцілі расправы. Тады на Ціхіню пачалі здалёку пляваць, і сакратару ЦК крыху з таго дасталося».

Лукашэнку парвалі пінжак

Лукашэнка дэманструе запэцканыя штаны
Лукашэнка дэманструе запэцканыя штаны

У 1994 Дом Ураду браў штурмам дэпутат Аляксандар Лукашэнка. Ужо адбыліся выбары, але афіцыйныя вынікі яшчэ не былі агучаныя Міліцыя не пускала Лукашэнку ў сярэдзіну будынка, ён настойліва прарываўся, дзёрзка адштурхоўваючы людзей у форме і размахваючы рукамі. Усё гэта здымалі журналісты. На Лукашэнку падчас той бойкі парвалі пінжак, які ён пазычыў ці то ў Ціцянкова, ці то ў Сініцына. Лукашэнка дэманстраваў тады «пацярпелы» пінжак і крычаў, што міліцыя служыць рэжыму і душыць змагара за дэмакратыю.

Казуліна пабілі, калі прарываўся на ІІІ Усебеларускі сход

2 сакавіка 2006 г кандыдат на прэзыдэнта Аляксандар Казулін зьявіўся ў Палац чыгуначнікаў, каб зарэгістравацца дэлегатам на ІІІ Усебеларускі сход, але яго не пусьцілі. Больш за тое, зьбілі й кінулі на падлогу аўтамабіля. У міліцыі, куды яго прывезьлі, палітык разьбіў шкло на партрэце Аляксандра Лукашэнкі. У судзе міліцыянт Якімовіч заявіў, што Казулін нібыта парваў яму куртку і абразіў. Аляксандар Казулін заявіў суду, што нікога ня біў, а толькі затрымаў Якімовіча, бо той ужыў сьлезацечны газ.

Статкевіч даў поўху Азаронку

Юры Азаронак
Юры Азаронак

Лукашэнкаўскі прапагандыст Азаронак атрымаў поўху ад Міколы Статкевіча. Палітык урэзаў рэжысэру за фільм «Дзеці хлусьні», у якім той таптаўся па беларускім нацыянальным руху, гістарычным сьцягу й гербе. «Я не думаю, што такімі рэчамі варта ганарыцца, але я зрабіў тое, што мусіў зрабіць». Азаронак падаў на Статкевіча ў суд, прадставіўшы даведку аб «кровападцёку на левай шчацэ».

Фядута даў высьпятка Рымашэўскаму

31 студзеня 2012 г Лябедзька, Мілінкевіч, Някляеў, Янукевіч рыхтавалі падпісаньне пагадненьня пра супольны ўдзел у «выбарах» у Палату прадстаўнікоў. Аднак Віталь Рымашэўскі з Беларускай хрысьціянскай дэмакратыі, нечакана для прысутных, адмовіўся падпісваць дакумэнт, абгрунтаваўшы гэта тым, што «нельга ўдзельнічаць у выбарах пры наяўнасьці палітычных зьняволеных». Гэта моцна раззлавала Аляксандра Фядуту з «Гавары праўду», і той даў яму высьпятка. «Думаю, што я зьдзейсьніў мару многіх беларусаў, што цікавяцца палітыкай, — даць высьпятка зарэгістраванаму кандыдату ў прэзыдэнты», — жартаваў пасьля Фядута.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG