На двары
Захаваецца пахаладаньне, воблачнасьць зьменшыцца. Уначы магчымыя замаразкі, днём ад 12 да 19 градусаў цяпла.
Сёньня ў Беларусі і сьвеце
Мае закончыцца візыт у Менск прэзыдэнта Казахстану Нурсултана Назарбаева.
У Брусэлі пад кіраўніцтвам Кэтрын Эштан адкрыецца сустрэча Рады Эўразьвязу ў міжнародных справах. На парадку дня – дачыненьні з Аўганістанам, Расеяй, Украінай.
У нямецкім Боне пачынаецца міжнародная канфэрэнцыя, дзе будуць абмяркоўвацца зьмены клімату.
У менскім клюбе «Графіці» ўвечары выступіць гурт «Памідор/Off».
Таксама ў гэты дзень
1613 – мястэчка Жыровічы атрымала магдэбургскае права.
1874 – у Менску пачаў дзейнічаць першы фантан, упрыгожаны скульптурнай кампазыцыяй «Хлопчык зь лебедзем».
1917 – у Менску створанае Першае таварыства беларускай драмы і камэдыі, якое заснавалі Фларыян Ждановіч і Ігнат Буйніцкі.
1954 – у Гаазе дзяржавы-сябры ААН падпісалі «Канвэнцыю аб абароне культурных каштоўнасьцяў у выпадку ўзброенага канфлікту».
У 1955 – у Варшаве падпісалі дэклярацыю аб стварэньні Арганізацыі Вайсковай дамовы. Так званая Варшаўская дамова краінаў сацлягеру існавала да 1 ліпеня 1991 году
1988 – пачаўся вывад савецкіх войскаў з Аўганістану.
1995 – у Беларусі адбыліся парлямэнцкія выбары і рэфэрэндум, у выніку якога краіна зьмяніла дзяржаўную сымболіку часоў адноўленай незалежнасьці – герб «Пагоня» і бел-чырвона-белы сьцяг на падпраўленыя савецкія сымбалі. Сёньня ў Рэспубліцы Беларусь у сувязі з гэтым афіцыйна адзначаецца Дзень дзяржаўнага герба і сьцяга. За вывешваньне нацыянальнага сьцяга застаецца ў зьняволеньні палітвязень Сяргей Каваленка.
1996 – у Менску адбылася 5-тысячная дэманстрацыя супраць арышту ўдзельнікаў “Чарнобыльскага шляху”.
2011 – у Партызанскім райсудзе Менску завяршыўся адзін з пасьлявыбарчых працэсаў. Кандыдат у прэзыдэнты Андрэй Саньнікаў атрымаў 5 гадоў калёніі. Удзельнікі Плошчы Алег Гнедчык, Ільля Васілевіч, Фёдар Мірзаянаў і Ўладзімір Яроменак – атрымалі ад 3 да 3,5 гадоў калёніі ўзмоцненага рэжыму. Прысуды выносіла судзьдзя Натальля Чацьвертакова.
У гэты дзень нарадзіліся
1899 – Тодар Куніцкі, лекар, адзін з заснавальнікаў Беларускага Студэнцкага Саюза ў Вільні і Беларускага Сялянскага Саюза.
1944 - Джордж Лукас, вядомы амэрыканскі кінарэжысёр
У гэты дзень памерлі
1873 - Міхаіл Дзмітрыеў, дырэктар Наваградзкай гімназіі .
1939 – у савецкім канцлягеры ў пасёлку Княж-Пагост (Комі АССР, цяпер Рэспубліка Комі) памёр Павел Жаўрыд, дзеяч нацыянальна-вызваленчага руху, адзін з кіраўнікоў Слуцкага паўстаньня.
Мінус 365
Хочаш купіць даляры? Пакажы даведку, што за мяжою памёр сваяк
ЗША анулявалі вынікі лятэрэі Green Card
Эўразьвяз і ЗША асудзілі прысуд Саньнікаву і іншым удзельнікам Плошчы
Цытата на памяць
"Наша мова і гісторыя прынятыя не галасаваньнем, а дадзеныя Богам. Іншая мова, іншая гісторыя — гэта іншы народ".
З прамовы кандыдата ў прэзыдэнты
Уладзіміра Някляева падчас суду над ім 14 траўня 2011 году.