На Берасьцейшчыне ледзь не згарэла 400-гадовая царква
У вёсцы Зьбірагі Берасьцейскага раёну ледзь не згарэла 400-гадовая царква Сьвятой Параскевы Пятніцы. Уратавалі помнік архітэктуры супрацоўнікі МНС.
Калі ратавальнікі прыехалі на месца, то ўбачылі, што з-пад падлогі ідзе дым. Каб пагасіць агонь, давялося выразаць бензапілой частку падлогі. Паводле адной з вэрсій ратавальнікаў, узгараньне магло адбыцца з-за таго, што пад дошкі праваліўся вугаль з кадзіла.
Акрамя парэзанай пілой падлогі, пашкоджаньняў царкве нанесена ня было.
Фота К. Шастоўскага, Radzima.org
Царква Сьвятой Параскевы Пятніцы ў Зьбірагах зьяўляецца помнікам архітэктуры і ахоўваецца дзяржавай.
Паводле інфармацыі на ахоўнай шыльдзе, яна пабудаваная ў 1502 годзе. Аднак некаторыя дасьледчыкі лічаць, што царкву збудавалі ўніяты ў 1610 годзе на грошы мэцэнаткі Агаты Сапегі.