Пад пагрозай таксама магчымасьць датэрміновага вызваленьня Алеся Бяляцкага паводле ліпеньскай амністыі.
Вязень Бабруйскай калёніі Алесь Бяляцкі даслаў ліст свайму калегу і сябру праваабаронцу Валянціну Стэфановічу. Бяляцкі паведаміў пра праблемы, якія ў яго ўзьніклі ў сувязі з рашэньнем суду спагнаць зь яго яшчэ 140 мільёнаў рублёў пені ў дадатак да 700 мільёнаў, якія ён ўжо сплаціў.
Стэфановіч: «Гэта новая сытуацыя, якая ўскладняе становішча Алеся. У лісьце ён мне напісаў, што паколькі зноўку ёсьць да яго матэрыяльныя патрабаваньні, то „атаварка“ ў турэмнай краме будзе ўжо не на 5 базавых велічынь, а на адну. А галоўнае — узьнікае пытаньне з магчымай амністыяй. Вельмі часта ў тэксьце закону аб амністыі ўказваюць, што яна не распаўсюджваецца на тых вязьняў, да якіх ёсьць матэрыяльныя патрабаваньні, якія не пагашаныя. Як мы зараз ведаем, да 3 ліпяня будзе прымеркаваная амністыя, і Алесь Бяляцкі, калі б у яго не было такіх матэрыяльных патрабаваньняў, мог бы разьлічваць трапіць пад амністыю. Але зараз узьнікае праблема».
Днямі Алесь Бяляцкі накіраваў дадатак да нагляднай скаргі ў Менскі абласны суд, якую ён дасылаў на пачатку красавіка. Дадатак тычыцца рашэньня Першамайскага суду Менску спагнаць з праваабаронцы яшчэ 140 мільёнаў рублёў пені на тую суму грошай у пакрыцьцё стратаў, якую ён ўжо выплаціў. У 2011 годзе падаткавікі вырашылі спагнаць з Бяляцкага 350 мільёнаў, потым гэтыя выплаты былі праіндэксаваныя да 700 мільёнаў, а цяпер суд пастанавіў спагнаць з праваабаронцы яшчэ 140 мільёнаў. Валянцін Стэфановіч лічыць гэтыя дзеяньні незаконнымі:
Пеня магла быць, але індэксацыю сумы суд зрабіў абсалютна адвольна і незаконна.
«Пеня магла быць, але індэксацыю сумы суд зрабіў абсалютна адвольна і незаконна, паколькі Падатковы кодэкс прадугледжвае толькі адзін варыянт мадэрнізацыі запазычанасьці — гэта пеня, больш ніякіх індэксацый быць ня можа».
Калі адбудзецца разгляд нагляднай скаргі яшчэ невядома. Касацыйная скарга праваабаронцы на прысуд не была задаволеная.
У лісьце Валянціну Стэфановічу Алесь Бяляцкі падрабязна апісаў свой працоўны дзень у калёніі. Аказваецца, ён вельмі напружаны.
Стэфановіч: «Шмат часу ў яго займае праца. Фактычна вольнага часу ў яго не застаецца. Працуе на ўпакоўцы швэйных вырабаў, пальчатак ды рукавіцаў. Потым рознае самаабслугоўваньне, трэба прыбіраць і гэтак далей. Тры праверкі за дзень. Піша, што гэта забірае амаль увесь вольны час, ня шмат часу на тое, каб чытаць кнігі ці пісаць лісты. Тэлевізар ён фактычна таксама не глядзіць. Увечары засынае вельмі хутка, бо за дзень моцна стамляецца. А ў 5:30 раніцы зноўку пад’ём і зноўку на працу і гэтак далей».
Не гледзячы на занятасьць, Алесь Бяляцкі ўсё ж знаходзіць час ліставацца зь сябрамі і сваякамі.
Жонка палітвязьня
Натальля Пінчук: «У Алеся асаблівых навінаў няма. Прыйшлі сёньня ад яго лісты, але гэта лісты сыну. І мне даслаў паштоўку».
Праваабаронца быў асуджаны на 4,5 году зьняволеньня паводле абвінавачаньня ва ўтойваньні вялікіх прыбыткаў. Міжнародныя праваабарончыя арганізацыі прызналі Алеся Бяляцкага палітвязьнем.