Лінкі ўнівэрсальнага доступу

Былыя баевікі прыедуць у Менск вучыцца


Баевікі Руху за вызваленьне дэльты Нігера ў 2008 годзе рыхтуюцца да апэрацыі супраць нігерыйскага войска
Баевікі Руху за вызваленьне дэльты Нігера ў 2008 годзе рыхтуюцца да апэрацыі супраць нігерыйскага войска

Нігерыйскі ўрад 30 студзеня паслаў на вучобу ў Беларусь і Паўднёваафрыканскую рэспубліку 146 былых баевікоў з дэльты Нігеру.

Паводле афрыканскага інфармацыйнага парталу allAfrica, былыя нігерыйскія баевікі правядуць пяць гадоў у Беларусі, вывучаючы такія спэцыяльнасьці, як інфарматыка, нафтахімія і радыёэлектроніка.

Партал піша, што ў Беларусі нігерыйцы будуць вучыцца ў Беларускім дзяржаўным унівэрсытэце, але ня выключана, што насамрэч маецца на ўвазе Беларускі дзяржаўны ўнівэрсытэт інфарматыкі і радыёэлектронікі.

Кожны з навучэнцаў атрымаў ад нігерыйскага ўраду на дарогу кампутар-лэптоп.

Паводле згаданага парталу, сёлета урадавай праграмай навучаньня ў Нігерыі і за мяжой будуць ахопленыя каля 12 тысячаў былых баевікоў, якія раней змагаліся супраць урадавых сілаў у дэльце ракі Нігер.

У дэльце Нігеру знаходзяцца багатыя радовішчы нафты, здабываньнем якой займаюцца такія міжнародныя кампаніі як Royal Dutch Shell, Exxon Mobil і Chevron. Аплаты за карыстаньне радовішчамі зьяўляюцца асноўнай крыніцай даходаў нігерыйскага ўраду.

Некалькі гадоў таму нігерыйскі фэдэральны ўрад і паўстанцы ў дэльце Нігеру дамовіліся аб перамір’і ды амністыі.

Паводле агенцтва Ройтэрс, кожны з баевікоў, якія падпалі пад амністыю, атрымаў ад ураду месячную стыпэндыю на 420 даляраў (гэта лічыцца вельмі прыстойнай сумай у краіне, дзе большасьць насельніцтва вымушана пражыць дзень на два даляры).
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG