Кастусь Смолікаў патрабуе знайсьці вінаватых у зьнішчэньні “Пагоні”
Старшыня абласной суполкі Партыі БНФ зьвярнуўся ў пракуратуру зь лістом пра зьнішчэньне дзяржаўнай маёмасьці — унікальнага комплексу вітражоў у будынку віцебскага чыгуначнага вакзалу.
У цэнтральным акне другога паверха была «Пагоня», а цяпер толькі цёмнае шкло.
Гэты комплекс складаўся зь сямі вітражоў у вокнах другога паверху. У цэнтральным акне была выява «Пагоні», якая, дарэчы, летась стала галоўным элемэнтам герба Віцебскай вобласьці. У вокнах паабапал былі выявы гербаў шасьці абласных гарадоў Беларусі.
У лісьце да пракурора Чыгуначнага раёну
Кастусь Смолікаў піша: «Падчас рэканструкцыі будынку чыгуначнага вакзалу станцыі Віцебск адказнымі асобамі Віцебскага аддзяленьня Беларускай чыгункі быў зьдзейсьнены адкрыты і нахабны ўчынак па варварскім зьнішчэньні дзяржаўнай маёмасьці. Вітражы ў вокнах другога паверха, якія зьяўляліся ўнікальнымі, былі разьбітыя і выкінутыя на сьметнік. Пры гэтым ні аўтар вітражоў, заслужаны мастак Вікенці Ральцэвіч, ні грамадзкасьць гораду не былі праінфармаваныя пра намеры кіраўніцтва. Між тым вітражы маглі б быць выстаўленыя ў іншым месцы і дэманстраваць усім гасьцям Віцебску і самім віцяблянам дасягненьні мастацкай культуры гораду. Прашу даць ацэнку дзеяньням службовых асобаў Віцебскага аддзяленьня Беларускай чыгункі».
Вітражы павыкідалі ў сьмецьце. Факт зьнішчэньня мастацкага твору выклікаў вялікую хвалю асуджэньня ў грамадзкіх і мастацкіх колах ня толькі ў Віцебску, але і па ўсёй краіне.
Будынак вакзалу рамантавалі і абнаўлялі за апошнія дзесяцігодзьдзі некалькі разоў. Вітражны ансамбаль з выявай «Пагоні» і надпісам «Беларусь» зьявіўся ў
1990-я гады.
Цяпер замест вітражоў у вокнах будынку, узьведзенага ў 1946 годзе ў стылі «сталінскі ампір», ставяць рамы з зацемненым шклом.
Будынак вакзалу — на чарговай рэканструкцыі. Будынак вакзалу перажывае чарговую рэканструкцыю паводле плянаў старшыні Віцебскага аблвыканкаму Аляксандра Косінца: ён загадаў рэканструяваць усю вуліцу Кірава, якая ідзе ад вакзалу ў цэнтар гораду. Рэканструкцыю вакзалу павінны скончыць да 1 ліпеня — да пачатку фэстывалю «Славянскі базар».