У Менску прайшла акцыя “Свабоду Кашэўскаму!”
Улёткі з заклікам «Свабоду Кашэўскаму!» раздалі ў цэнтры Менску актывісты Маладых хрысьціянскіх дэмакратаў.
Паводле лідэра МХД Любові Каменевай, «улёткі разыходзіліся, як гарачыя піражкі».
Андрусь Кашэўскі адбывае ў СІЗА 15 сутак адміністрацыйнага арышту за дробнае хуліганства. Спадар Кашэўскі займаўся распаўсюдам недзяржаўнай газэты «Народная Воля», аднак пры затрыманьні газэт у яго не было.
Нагадаем, сябра БХД са Смалявічаў Андрусь Кашэўскі, які зьбіраўся балятавацца ў Жодзінскі гарсавет і Менскі аблсавет, быў затрыманы вечарам 3 сакавіка ў мэтро. Актывіста даставілі ў суд Ленінскага раёну Менску.
Паколькі Кашэўскі сам не пасьпявае своечасова падаць дакумэнты на рэгістрацыю, у панядзелак разам зь юрыстамі гэтым зоймецца лідэр БХД Павал Севярынец, паведамляе прэсавая служба БХД.