"Малады фронт" назваў ляўрэатаў прэміі “Люблю Беларусь”
Спачатку “Малады фронт” плянаваў уручыць прэміі на Дзень сьвятога Валянціна ў менскім гатэлі “Кроўн плаза”. Але адміністрацыя гатэлю скасавала дамову на арэнду залі.
“Малады фронт” вырашыў не ладзіць сьвяточнай цырымоніі, а ўручыць прэміі ляўрэатам прыватна. Прэміі ўяўляюць сабою бронзавага колеру статуэткі з надпісам — Купалавым радком: “Зерне, кінутае ў ніву, усходзіць ды красуе”. Самі прызы яшчэ не гатовыя.
Іван Шыла
Пераможцамі ў намінацыі “Беларусізацыя” сталі Алена Макоўская і Ніна Шыдлоўская за кампанію “Будзьма”.
У намінацыі “Pro-Belarus” дыплём і статуэтку атрымае амбасадар Швэцыі
Стэфан Эрыксан за стварэньне клюбу беларускамоўных дыпляматаў.
Рэдакцыя газэты “Наша Ніва” атрымае прэмію ў намінацыі “Журналістыка” за няспынную дзейнасьць на ніве папулярызацыі беларушчыны.
У намінацыі “Спорт” прэмію атрымае фанацкая ініцыятыва “Тарпеда-Менск”. Маладафронтаўцы адзначылі “адраджэньне легендарнай футбольнай каманды, актыўнае выкарыстаньне беларускай мовы ў сваёй атрыбутыцы і на сайце клюбу”.
У намінацыі “Грамадзкая чыннасьць” узнагародзяць
Міхася Пашкевіча за кампанію з патрабаваньнем альтэрнатыўнай службы.
У галіне “Культура” маладафронтаўцы вызначылі
Мікалая Халезіна як кіраўніка “Свабоднага тэатру” і за актыўнае выказваньне грамадзянскай пазыцыі.
Сярод палітыкаў у намінацыі “Палітыка” маладафронтаўцы ўзнагародзяць
Аляксея Янукевіча з фармулёўкай “за зьмену пакаленьняў у БНФ”.
У намінацыі “Змагар году” маладафронтаўцы ўзнагародзяць свайго паплечніка
Арцёма Дубскага, які знаходзіцца за кратамі.
А 14 лютага маладафронтаўцы зьбіраюцца правесьці сьвяточнае шэсьце з фэервэркамі ў цэнтры Менску. Заяўкі на правядзеньне акцыі яны не падавалі.