Прэмія “Angelus” – найстарэйшаму чэскаму пісьменьніку-дысыдэнту
Уручэньне прэміі, за адсутнага аўтара прэмію прыняў перакладчык Анджэй Ягадзіньскі
05.12.2009 23:32
Ва ўроцлаўскім музычным тэатры Capitol адбылося прысуджэньне штогадовай сярэднеэўрапейскай літаратурнай прэміі “Angelus”. Сёлетнім ляўрэатам стаў нэстар чэскай эміграцыйнай літаратуры Ёзэф Шкворэцкі.
Шкворэцкі атрымаў прэмію за перакладзены на польскую мову 800-старонкавы раман “Прыгоды інжынэра чалавечых душ”, які ўпершыню пабачыў сьвет тры дзясяткі гадоў таму ў Таронта, дзе ад 70-х гадоў жыве сам аўтар.
85-гадовы Шкворэцкі ня змог прыехаць у Ўроцлаў з увагі на стан здароўя. Прэмію ад яго імя прыняў перакладчык Анджэй Ягадзіньскі. Абвясьціла прысуд журы яго нязьменная старшыня – легендарная савецкая дысыдэнтка, удзельніца дэманстрацыі жніўня 1968 году на Краснай плошчы ў Маскве – Натальля Гарбанеўская.
Шкворэцкі – аўтар раманаў “Баязьліўцы”, “Танкавы батальён”, “Цуд”, заснавальнік найбуйнешага чэскага эміграцыйнага выдавецтва “Sixty-Eight Publishers”.
Фіналіст конкурсу Ігар Бабкоў у панядзелак будзе госьцем ранішняга жывога эфіру “Радыё Свабода”.