Сёньня Аляксандар Лукашэнка нэрвова адрэагаваў на ўчорашнія выказваньні міністра фінансаў Расеі Аляксея Кудрына, які заявіў, што Беларусь наблізілася да мяжы неплатаздольнасьці, ды зьвязаў выдзяленьне Менску апошняй траншы расейскага крэдыту памерам у 500 мільёнаў даляраў з антыкрызіснымі дзеяньнямі беларускага ўраду. Лукашэнка загадаў беларускаму ўраду “ня кланяцца перад Расеяй і шукаць шчасьця ў іншай частцы плянэты”. СЛУХАЦЬ:
Сёньня ў Менску прайшла нарада па пытаньнях сацыяльна-эканамічнага разьвіцьця Беларусі — мерапрыемства, якое загадзя не анансавалася і якое, відавочна, стала адказам на вынікі ўчорашняга візыту ў Менск прэм’ер-міністра Расеі
Ўладзімера Пуціна. Адкрываючы нараду, Аляксандар Лукашэнка запатрабаваў ад урадоўцаў перастаць выпрошваць у Расеі падтрымку і пачаць наладжваць гандлёва-эканамічнае супрацоўніцтва па іншых кірунках.
“Не атрымліваецца ў Расеі — ня трэба кланяцца, ня трэба ныць і плакаць. Трэба шукаць сваё шчасьце ў іншай частцы плянэты. Я гэта сьвядома публічна кажу. Вы ўчора назіралі цікавую сытуацыю, калі прэзыдэнт сядзіць з Уладзімерам Уладзімеравічам Пуціным і абмяркоўвае на сяброўскай ноце пытаньні, пачынаючы ад асабістых, прыватных і заканчваючы дзяржаўнымі. А ў гэты час Кудрын дае прэсавую канфэрэнцыю, сутнасьць якой — пасеяць паніку ў Беларусі”, — заявіў кіраўнік Беларусі.
Аляксандар Лукашэнка нават заявіў, што Кудрын “цалкам кансалідаваўся з нашымі адмарозкамі, якія тут на заходнія грошы вякаюць і пачынаюць вучыць працаваць”.
Абурылі Аляксандра Лукашэнку ўчорашнія выказваньні міністра фінансаў Расеі Аляксея Кудрына. Апошні заявіў у Менску, што Расея можа “сутыкнуцца зь неплатаздольнасьцю беларускай эканомікі ў канцы году альбо ў наступным годзе”. Магчыма, асабліва разьюшыла Лукашэнку тая гульня ў добрага і кепскага сьледчага, якую прадэманстравалі Ўладзімер Пуцін і Аляксей Кудрын — пакуль Кудрын ставіў пахавальныя дыягназы беларускай эканоміцы, Пуцін хваліў беларускія дасягненьні і абяцаў, што Расея заўсёды падставіць плячо. Паводле Лукашэнкі, “учора Пуцін сказаў, што на падлёце да Менску абмяркоўваў з Кудрыным сытуацыю. І тут Кудрын выбухнуў тырадай. Што — гэта не было ўзгоднена? Усё гэта было ўзгоднена!”
Лукашэнка заклікаў урад “будаваць сваю эканоміку і палітыку як сувэрэнная дзяржава” і выкарыстоўваць альтэрнатыўныя Расеі магчымасьці ўзьдзеяньня на сытуацыю і на тыя выклікі, якія Беларусі ствараюць, у тым ліку і ў Расеі”.
Палітоляг
Уладзімер Мацкевіч адзначае, што беларускае кіраўніцтва ўсё больш разумее абмежаванасьць расейскага рынку і неабходнасьць арыентавацца на рынкі заходнія:
“Даўно зразумела, што расейскі рынак для Беларусі вычарпаны. Далейшае павялічэньне гандлю з Расеяй ужо немагчымае. Таму трэба пераарыентоўвацца на заходнія рынкі. Нават не на краіны трэцяга сьвету, а менавіта на заходнія — там ёсьць грошы, там ёсьць спажывецкі рынак, туды трэба прасоўваць свае тавары.
Да таго ж Расея патрапіла ў вялізарны крызіс, і іхнія магчымасьці вельмі малыя, каб даваць камусьці крэдыты. А рэзкія выказваньні Лукашэнкі — справа звыклая. Сёньня зрабіў, заўтра забраў назад, і гэтак далей”.