Лінкі ўнівэрсальнага доступу

Прысуд Мікіту Ліхавіду пакінулі бязь зьмены


Мікіта Ліхавід
Мікіта Ліхавід
Менгарсуд пакінуў бяз зьмены прысуд актывісту руху "За свабоду" Мікіту Ліхавіду. Маці Паўла Севярынца не дазволілі спатканьне зь ім напярэдадні суду. У ізалятары на Акрэсьціне трымае галадоўку былы лідэр "Моладзі БНФ" Алесь Каліта.

29 красавіка ў Менскім гарадзкім судзе разглядалася скарга Мікіты Ліхавіда на прысуд Партызанскага суду, паводле якога актывіста асудзілі на 3,5 гады зьняволеньня. Вынік – прысуд пакінулі бязь зьмены. "Адвакат хадайнічала, каб Мікіту прывезьлі ў суд. Судзьдзі параіліся хвіліну і адмовілі", -- паведаміла маці актывіста Алена Ліхавід.

Алена Ліхавід
"Потым пачала выступаць адвакат. Болей за гадзіну яна гаварыла, вельмі пераканаўча даказвала, што прысуд трэба адмяніць. Я паглядзела на аднаго з судзьдзяў, і ў нейкі момант мне падалося, што вось яно! На ягоным твары быццам было напісана, што ён усё разумее і з усім згодны. Але яны зноў пайшлі ў пакой для парадаў, і калі праз 20 хвілінаў выйшлі, то я зразумела, што надзея была прывідная".

Мікіту Ліхавіда, паводле маці вязьня, адправяць па этапе ў калёнію ў Наваполацку 7 траўня. Да таго часу Алена Ліхавід спадзяецца яшчэ атрымаць спатканьне з сынам на "Валадарцы".

Няўдачай закончылася спроба спаткацца з сынам для Тацьцяны Севярынец. Маці сузаснавальніка БХД Паўла Севярынца меркавала пабачыцца з сынам да суду, але у судзьдзі Жанны Брыхінай на гэты конт аказаліся свае меркаваньні.

Тацяна Севярынец
"Сёньня ранкам атрымала 2 лісты з Завадзкога суду Менска. Ад судзьдзі Брыхінай, за яе подпісам. Што, маўляў, спатканьне з Паўлам можа быць толькі пасьля абвяшчэньня прысуду. Гэта адказ на першую маю заяву. А на другую, дзе я прасіла дапусьціць да Паўла сьвятара, Брыхіна адказала, што гэта не ў кампэтэнцыі суду. І не патрапіў да яго сёньня адвакат. Хаця зранку адвакат пайшоў да яго, але была вялікая чарга і не пусьцілі".

Паўла Севярынца будуць судзіць 11 траўня разам з журналісткай Ірынай Халіп і кіраўніком штабу Статкевіча Сяргеем Марцалевым. Дарэчы, сёньня, 29 красавіка, вязень СІЗА КДБ Сяргей Марцалеў, адзначыў дзень народзінаў – яму споўнілася 34 гады.

Алесь Каліта
Актывіст Партыі БНФ, былы старшыня «Моладзі БНФ» Алесь Каліта
, які 24 красавіка ў Гомелі быў пакараны арыштам на 10 сутак, зараз знаходзіцца ў ізалятары на Акрэсціна, паведамілі праваабаронцы цэнтру "Вясна". Прычыны гэтага раптоўнага перамяшчэньня актывіста праваабаронцам невядомыя. Нагадаем, 24 красавіка ў судзе Чыгуначнага раёна Гомеля Алеся Каліту абвінавацілі ў дробным хуліганстве і асудзілі на 10 сутак арышту.

Назіральнікі не выключаюць, што арышт актывіста зьвязаны са справай аб тэракце ў мэтро. Паводле зьвестак, ў войску Алесь Каліта служыў разам з адным з абвінавачаных у тэракце. Паводле зьвестак правабаронцаў, Алесь Каліта за кратамі абвясьціў галадоўку.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG