Міліцыя правярае ліквідатараў і ўдзельнікаў “гарачых кропак”
Пра гэта паведаміў Радыё “Свабода” ліквідатар чарнобыльскай аварыі Мікалай зь Менску. Паводле Мікалая, яго выклікалі ў райаддзел міліцыі і запатрабавалі здаць адбіткі пальцаў.
“У калідорах райаддзелу поўна людзей: выклікаюць ліквідатараў, а таксама ўдзельнікаў розных канфліктаў у “гарачых кропках”. Пытаюцца, дзе быў у ноч на 4 ліпеня, і прапануюць здаць адбіткі пальцаў. Пакуль толькі прапануюць. Што да мяне, я адмовіўся здаваць, бо лічу гэта незаконным. Я тады ўвогуле ня быў у Менску, пры чым тут мае пальцы?”
Мікалай не назваў свайго прозьвішча. Ён пабойваецца, каб за адмову здаваць адбіткі пальцаў у яго ня ўзьнікла праблемаў.
У прэсавай службе МУС адносна сьледзтва ў справе выбуху кажуць: “вядуцца пэўныя дзеяньні, якія прадугледжаныя законам”, але падрабязнасьцяў не паведамляюць. Паводле незалежных крыніц, у ізалятары на Акрэсьціна ў сувязі з расьсьледаваньнем выбуху ўтрымліваюць болей за 50 чалавек.