Грамадзтва

Мікалай Чаргінец судзіцца зь недзяржаўнымі журналістамі

05.12.2007 19:23

Любоў Лунёва

У судзе Першамайскага раёну Менску адбылося папярэдняе паседжаньне ў справе пазову старшыні камісіі па нацыянальнай бясьпецы Палаты прадстаўнікоў Мікалая Чаргінца да журналіста Аляксандра Тамковіча і ўнітарнага прадпрыемства “Время новостей”, якое выдае недзяржаўную газэту “Новы час”. Мікалай Чаргінец патрабуе кампэнсацыяў за абразу свайго гонару і годнасьці: з Тамковіча 100 мільёнаў рублёў, а з выдавецтва — 500 мільёнаў.

Падставай для звароту ў суд стаў артыкул Аляксандра Тамковіча, надрукаваны ў газэце “Новы час” — “Генэрал-сэнатар Мікалай Чаргінец”. У сваім пазове Чаргінец спаслаўся на тое, што ягонае імя нібыта было згадана ў зьвязку з “віцебскай справай”, калі расстралялі невінаватага чалавека.

На думку аўтара публікацыі Аляксандра Тамковіча, які цяпер змагаецца зь цяжкай хваробай, сапраўднай прычынай стала тое, што ў сваім артыкуле ён назваў саюз пісьменьнікаў, які ўзначальвае Мікалай Чаргінец, “правільным”. Паводле журналіста, галоўная мэта пазову, які спадар Чаргінец падаў праз два месяцы пасьля публікацыі артыкулу, — ліквідацыя недзяржаўнай газэты “Новы час”.

“Ён зрабіў звычайную кампіляцыю з тэксту. Лічу, што гэта ўдар ня супраць мяне, а ўдар па газэце “Новы час”, дзе цяпер друкуюцца пісьменьнікі, якія не ўваходзяць у так званы “правільны” Саюз пісьменьнікаў. Перш за ўсё гэта наезд на “пашкевіцкі” Саюз пісьменьнікаў. Яшчэ адна прычына ў тым, што я не лічу Чаргінца вялікім пісьменьнікам”.

Гаворыць рэдактар газэты Аляксей Кароль:

“У самім артыкуле ніхто ня бачыць падставаў для пазову аб абразе гонару і годнасьці. Ёсьць факты і ёсьць канкрэтныя меркаваньні. Тое, што ў межах. Я паглядзеў апошні нумар “Эконаміста”, артыкул пра Браўна, пераемніка Тоні Блэра. Дык там такія эпітэты, што нам і ня сьнілася. Гэта лёс публічнага палітыка. Але ў нас, здаецца, зноў з’яўляюцца зоны па-за крытычнай увагай”.

Мікалай Чаргінец паведаміў, што калі выйграе справу, то перадасьць грошы на лячэньне псыхічна хворых.

“Ну хоча ён, хай называе гэты Саюз няправільным. Гэта ягонае права. Абразіў і паклёпнічаў на мяне, што я датычны да так званых “віцебскіх справаў”. А я працаваў у горадзе Менску. А як вядома, Менск альбо ГУУС, дзе я працаваў, а да гэтага Ленінскі райаддзел, да гэтага Першамайскі райаддзел, да гэтага Савецкі — не камандуюць Віцебскам. Я быў першы, хто ўзьняў гэтае пытаньне”.

Судзьдзя Алена Ананіч прапаноўвала бакам заключыць перамір’е. Але прадстаўніца Мікалая Чаргінца адказала на ўсе прапановы рэдакцыі “Новага часу” адмоўна.

Гаворыць Аляксей Кароль:

“Мы прапаноўвалі прадставіць такую ж плошчу, на якой быў надрукаваны артыкул, для выказваньня ўласнага пункту гледжаньня спадара Чаргінца на гэтую справу. Гэта не было прынята. Бакі і суд вырашылі, што справа гатовая для абмеркаваньня на судзе”.

Судзьдзя Алена Ананіч прызначыла судовае паседжаньне на 19 сьнежня.