Лінкі ўнівэрсальнага доступу

Беларусь і Ўсходняе партнэрства


Jean-Eric Holzapfel
Jean-Eric Holzapfel

Сёньня Эўрапейская камісія агучыла праект Усходняга партнэрства. Ён тычыцца шасьці краінаў СНД, сярод якіх і Беларусь. З гэтай нагоды кіраўнік прадстаўніцтва Эўракамісіі ў Беларусі Жан-Эрык Гольцапфэль правёў адмысловую прэсавую канфэрэнцыю.

Кіраўнік прадстаўніцтва сказаў, што “гэтая ініцыятыва грунтуецца на добрым, сур’ёзным падмурку”. Ён дадаў, што яна скіраваная на суседзяў з Эўропы, а не на Марока ці Эгіпет, за што раней крытыкавалі Эўразьвяз. А на пытаньне “Свабоды”, ці можа быць посьпех у праекту, які аб’ядноўвае даволі розныя дзяржавы, дзьве зь якіх — Азэрбайджан і Армэнія — да таго ж абцяжараныя праблемай Нагорнага Карабаху, Жан-Эрык Гольцапфэль адказаў так:

“Краіны, якія ўваходзяць ва Ўсходняе партнэрства, маюць агульную гісторыю, вельмі падобную бягучую сытуацыю. Усе яны належаць да пераходных краінаў, перад імі ўсімі стаяць прыкладна адны і тыя ж праблемы.

Акрамя таго, у будучыні магчыма разьвіцьцё гэтай ініцыятывы. Бо сярод шасьці краінаў тры (Малдова, Украіна, Беларусь) стаяць трохі асобна. І, магчыма, у дачыненьні да іх ініцыятыва неяк эвалюцыянуе. Але ўжо добра, што Ўсходняе партнэрства было абвешчана”.

Анатоль Лябедзька
Сустаршыня Палітрады АДС Анатоль Лябедзька так ацэньвае новую ініцыятыву Брусэлю:

“Уцягваньне Беларусі ў праграмы Эўразьвязу — гэта, безумоўна, плюс, калі мы зыходзім з інтарэсаў краіны і людзей, якія тут жывуць. Мы гэта змушаны і павінны вітаць.

З другога боку, дрэнна, што ўсё адбываецца неяк за межамі адкрытага перамоўнага працэсу. Тыя рашэньні, якія прымаюцца, паходзяць з кулюараў. А прырода іх зьяўленьня не заўсёды зразумелая. І гэта мінус, які абцяжарвае саму сытуацыю. А так, калі Беларусь cпрычыніцца да праграмаў, якія будуць тычыцца адукацыі, аховы здароўя, памежнага супрацоўніцтва ці іншага, то гэта добра. І аб’яднаныя дэмсілы гатовыя ўнесьці свой унёсак у гэтыя праграмы”.

Журналістаў асабліва цікавіла, як Эўразьвяз будзе ацэньваць, адбываецца ці не прагрэс у Беларусі. Гэта тым важней, што першая траціна тэрміну, які атрымала краіна, падыходзіць да заканчэньня. Кіраўнік прадстаўніцтва Эўразьвязу ў Беларусі патлумачыў, што крытэраў такога вымярэньня сёньня няма, бо трэба было мець гнуткі інструмэнт дыялёгу:

“Мы наўмысна не рабілі нейкай дарожнай карты альбо пакрокавай стратэгіі, бо для нас важна было, каб працягваліся пазытыўныя зьмены. І таму ацэнка гэтых зьменаў па-ранейшаму застаецца адкрытай. Калі паглядзець на сфэру мэдыяў, дык калі мы фармулявалі свае патрабаваньні, мы мелі на ўвазе два ўзроўні. Першы — гэта ўзровень заканадаўчага рэгуляваньня і ўвогуле рамкі функцыянаваньня СМІ. А другі ўзровень мы бачылі ў канкрэтных дзеяньнях уладаў. Напрыклад, дазвол на распаўсюджваньне незалежных газэт. Альбо, напрыклад, акрэдытацыя журналістаў, паколькі ня ўсе яе маюць”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG