Культура

ЗША дапамогуць рэстаўраваць будынак, дзе выкладаў Шагал

Прадстаўнікі амбасады ЗША прывезьлі ў Віцебск сэртыфікат, які сьведчыць аб перамозе ў міжнародным конкурсе, прысьвечаным пэрспэктывам захаваньня культурнай спадчыны.

Дэлегацыю ўзначальваў Часовы павераны ў справах ЗША ў Беларусі Джонатан Мур, які паведаміў, што “Віцебскі цэнтар сучаснага мастацтва” атрымаў грант памерам 30 тысяч даляраў ЗША на рэстаўрацыю будынку Віцебскай народнай мастацкай вучэльні, заснаванай у 1919 годзе славутым Маркам Шагалам.

Амэрыканскія дыпляматы разам з начальнікам аддзелу культуры Віцебскага гарвыканкама Віктарам Кібісавым наведалі будынак па вуліцы імя газэты “Праўда”, дзе цяпер месьціцца “Віцебскі цэнтар сучаснага мастацтва” і дзе на пачатку мінулага стагодзьдзя выкладалі Марк Шагал, Юдаль Пэн, Казімір Малевіч.

Выступаючы перад прысутнымі, Часовы павераны ў справах ЗША ў Беларусі Джонатан Мур сказаў, што імя славутага віцебскага ўраджэнца Марка Шагала яму знаёмае зь дзяцінства, а да Віцебску ён мае ўвогуле асаблівае стаўленьне.

Калі мяне накіравалі працаваць у Менск, то адным зь першых гарадоў, які я наведаў, стаў менавіта Віцебск

"Я вельмі рады зноў быць у Віцебску. Падчас майго першага візыту я зь вялікім задавальненьнем пазнаёміўся з гісторыяй і культурай гораду. Нягледзячы на тое, што зараз я жыву і працую ў Менску, самым першым беларускім горадам, пра які я даведаўся, быў Віцебск. Калі мяне накіравалі працаваць у Менск, то адным зь першых гарадоў, які я наведаў, стаў менавіта Віцебск" , — распавёў Джонатан Мур.

Каб пра Віцебск згадвалася часьцей, “Віцебскі Цэнтар сучаснага мастацтва” падарыў Джонатану Муру копію ўнікальнага фотаздымка 1919 году — гэта групавы фотаздымак супрацоўнікаў Віцебскай народнай мастацкай вучэльні, сярод якіх і заснавальнік навучальнай установы, сусьветна вядомы мастак Марк Шагал.

Начальнік аддзелу культуры гарвыканкаму Віктар Кібісаў падараваў удзельнікам дэлегацыі кнігі пра мастацкае жыцьцё Віцебшчыны. Часовы павераны ў справах ЗША ў Беларусі Джонатан Мур таксама прывёз у падарунак кнігі і альбомы пра разьвіцьцё мастацтва ў ЗША
Дырэктарка “Віцебскага цэнтру сучаснага мастацтва” Валянціна Кірылава распавяла, што грант, які прынесла ўстанове перамога ў міжнародным конкурсе — а ў ім бралі ўдзел прадстаўнікі 60 краінаў сьвету — дазволіць перадусім памяняць вокны ў будынку. А гэта вельмі важна для добрай захаванасьці экспанатаў. Таксама мяркуецца, што ў пэрспэктыве ў будынку колішняй мастацкай вучэльні будуць працаваць навуковы, аналітычны і інфармацыйны цэнтры па вывучэньні спэцыфікі выяўленчага мастацтва пачатку мінулага стагодзьдзя. Агульны кошт рэстаўрацыі, паводле Валянціны Кірылавай, складзе паўтара мільярда рублёў.