Міліцыя запалохвае аршанскага праваабаронцу
04.08.2008 18:17
Праваабаронцу Алега Граблеўскага ўжо два тыдні міліцыянты шукаюць праз тэлефон і на кватэры ягоных бацькоў, аднак выпісаць позву на допыт адмаўляюцца.
Паводле спадара Граблеўскага, апошні тэлефонны званок да яго быў сёньня: невядомы мужчына, які прадставіўся маёрам Цынгалёвым з крымінальнага вышуку, запрасіў праваабаронцу на гутарку пра менскі выбух у ноч на 4 ліпеня. Калі Алег Граблеўскі чарговы раз адмовіўся ісьці ў міліцыю бяз позвы, невядомы прыгразіў, што ў такім выпадку па яго прыедуць зь Віцебскай абласной управы КДБ і пратрымаюць тыдні два пад арыштам.
Праваабаронца яшчэ раз абгрунтаваў сваё пазыцыю: ён ня пойдзе на допыт бяз позвы, бо толькі яна можа стаць дакумэнтальнай падставай для патрабаваньня прысутнасьці адваката на допыце. Да таго ж, у яго няма даверу да прадстаўнікоў міліцыі, якія імкнуцца дзейнічаць неафіцыйнымі мэтадамі.
Алег Граблеўскі паведаміў, што быў 3 ліпеня ў Менску па асабістых справах, аднак увечары зьехаў дадому ў Воршу.
Няма камэнтароў. Дадайце свой і будзьце першы