Кібэратака на сайт svaboda.org абмяркоўвалася ў АБСЭ
08.05.2008 20:43
Кіраўніца місіі ЗША пры АБСЭ выступіла сёньня на сустрэчы Сталай рады АБСЭ ў Вене з заявай наконт кібэратакі на сайт Беларускай службы “Радыё Свабода”.
Кіраўніца сталай місіі ЗША пры АБСЭ Джулі Фінлі выступіла сёньня з заявай наконт нядаўняй кібэратакі на сайт Беларускай службы “Радыё Свабода”.
26 красавіка вэбсайт Беларускай службы міжнароднай радыётэлестанцыі Радыё Свабода / Радыё Свабодная Эўропа, стаў аб'ектам кібэратакі. Калі адбылася атака, Беларуская служба РС рыхтавала адмысловае падрабязнае асьвятленьне пратэстаў у Менску з нагоды гадавіны Чарнобыльскай катастрофы. Атака тыпу “адмова ў абслузе” была відавочна скіраваная на тое, каб зрабіць атакаваны вэбсайт недаступным для карыстальнікаў.
У заяве адзначаецца, што тое, што адбылося з РС, было відавочным парушэньнем гарантыяў свабоды СМІ і свабоды слова, у абарону якіх выступае АБСЭ як арганізацыя і якія абавязаліся захоўваць усе 56 краін-удзельніц. Аднак гэтая новая форма агрэсіі мае яшчэ шырэйшыя наступствы для бясьпекі ў рэгіёне АБСЭ. Гэтая новая пагроза заслугоўвае далейшага дасьледаваньня. “Кібэратакі, гаворыцца ў заяве, – незалежна ад таго, ці іх прадпрымаюць улады з мэтай перакрыць свайму народу доступ да інфармацыі ў інтэрнэце [...] або нейкія тэрарыстычныя групы дзеля падобных мэтаў – мусяць быць асуджаныя і пакараныя. Нам патрэбная стратэгія, якая ўмацавала б нашую здольнасьць абараніцца ад такіх пагрозаў".
Прадстаўніца ЗША выступіла з рэкамэндацыяй Камітэту Бясьпекі АБСЭ уважліва разгледзець гэтае пытаньне і вырашыць, ці гэтай арганізацыі належыць ініцыяваць далейшую працу ў напрамку прадухіленьня будучых кібэратакаў.
Прадстаўнік Расеі ў адказ на амэрыканскую заяву зазначыў, што Расея занепакоеная пагрозай выкарыстаньня інтэрнэту тэрарыстамі. Беларускі прадстаўнік заявіў, што амэрыканскі бок сьпяшаецца з высновамі, бо атака магла паходзіць адкуль заўгодна, а само радыё, паводле яго, “нават не разьмешчана ў Беларусі”.