Жывапісец і пэрформэр зь мястэчка Бобр Крупскага раёну Менскай вобласьці прызнаў усе сьведчаньні, але не прызнаў сваёй віны. Папярэджаньне – за несанкцыяваны пікет, штраф – за непадпарадкаваньне міліцыі.
Суд доўжыўся каля 20 хвілінаў. У залі паседжаньняў апроч Алеся Пушкіна прысутнічалі ягоная жонка Яніна і малыя дзеці: Марылька палутара гадоў і Міколка чатырох гадоў.
27 сакавіка ў цэнтры Бабра разам з жонкай і дзецьмі Алесь Пушкін выставіў мальбэрт, на якім паставіў пірог з надпісам “90 год БНР”, якім частаваў аднавяскоўцаў. “Толькі літара “Р” засталася”, – распавёў Алесь Пушкін. Аздабленьнем мальбэрту сталіся некалькі шпакоўняў, герб “Пагоня” ды сьцягі: бел-чырвона-белы ды Эўразьвязу. У сьведчаньнях міліцыянт зазначыў, што бел-чырвона-белы – “былы дзяржаўны”. Алесь Пушкін пра прысуд:
“Кожны прысуд, які вынесены – ён злачынны. Таму што толькі апраўдальны прысуд сьвяту Дня Волі можа быць. Я б тады меў сатысфакцыю”.
Пра форму прысуду – штраф:
“Вельмі непрыемна, канешне. Бо ў фондаў я грошы не прасіў і прасіць ня буду. Выплачваць буду сам са свайго заробку”.
3 траўня Алесь Пушкін запатрабаваў вярнуць яму сьцягі ды герб “Пагоня”, які сам мастак лічыць творам мастацтва, паколькі выява герба – аўтарская праца Алеся Пушкіна. Судзьдзя затэлефанаваў міліцыянтам, чый райаддзел месьціцца праз дарогу ад суду. Міліцыянты паабяцалі вярнуць маёмасьць, але спаслаліся на адсутнасьць начальства: маўляў, цягам тыдня абавязкова вырашым праблему.
