51 працэнт беларусаў ухвалілі працу кіраўніцтва Расеі
18.04.2008 16:23
Гэта адзін з вынікаў апытаньня, праведзенага ў мінулым годзе амэрыканскай сацыялягічнай службай Гэлапа.
Паводле апытаньня, 20 працэнтаў беларусаў не ўхваляюць працы кіраўніцтва Расеі, а 29 працэнтаў ня вызначыліся альбо адмовіліся адказваць на пытаньне.
У дачыненьні да кіраўніцтва Эўразьвязу ўхвалу выказалі 27 працэнтаў апытаных, не ўхваляюць яго працы толькі 15 працэнтаў, і ажно 58 працэнтаў ня вызначыліся альбо адмовіліся адказваць на пытаньне. Працу кіраўніцтва ЗША ўхвалілі 11 працэнтаў апытаных, 53 працэнты выказаліся крытычна, і 36 працэнтаў адмовіліся адказваць на пытаньне альбо ня вызначыліся.
Калі перад апытанымі ставілі выбар – адносіны зь якімі краінамі для Беларусі важнейшыя – 33 працэнты пагадзіліся з варыянтам адказу, што блізкія адносіны з Расеяй больш важныя нават калі гэта можа пашкодзіць адносінам Беларусі з Эўразьвязам. Шэсьць працэнтаў апытаных выбралі супрацьлеглы адказ, а 37 працэнтаў дадалі свой варыянт адказу, што для Беларусі важна мець добрыя адносіны і з Расеяй і з Эўразьвязам. Яшчэ 24 працэнты апытаных ня вызначыліся альбо адмовіліся адказваць на пытаньне.
На аналягічнае пытаньне ў дачыненьні ЗША і Расеі 44 працэнты пагадзіліся з варыянтам адказу, што блізкія адносіны з Расеяй больш важныя нават калі гэта можа пашкодзіць адносінам Беларусі са Злучанымі Штатамі. Шэсьць працэнтаў апытаных выбралі супрацьлеглы адказ, а 36 працэнтаў дадалі свой варыянт адказу, што для Беларусі важна мець добрыя адносіны і з Расеяй і з Эўразьвязам. Яшчэ 14 працэнтаў апытаных ня вызначыліся альбо адмовіліся адказваць на пытаньне.
Дасьледаваньне было праведзенае зь ліпеня па верасень 2007 году мэтадам асабістага паытаньня сярод 1.114 рэспандэнтаў ва ўзросьце 15 гадоў і старэйшых.