Лорд Бэл чакае грошай і славы ад зьмены іміджу Беларусі
18.03.2008 15:05
Пра гэта вядомы кансультант ў галіне PR заявіў у інтэрвію маскоўскаму англамоўнаму выданьню «Moscow Times». Ён дадаў, што цягам некалькіх год яго кампанія разьлічвае заробіць мільёны даляраў на Лукашэнку.
Спрабуючы высьветліць усю сур’ёзнасьць словаў 66-гадовага брытанскага паліттэхноляга, журналісты лёнданскай Times патэлефанавалі лорду Бэлу і спыталіся, ці ня цяжка палепшыць імідж краіны, чый кіраўнік аднойчы сказаў: “Ня ўсё зьвязанае з Гітлерам было дрэнным”, лорд Бэл адказаў:
“Я толькі што выйшаў з самалёту”.
“Зь Беларусі?”
“Не, з Жэнэвы”, — пасьля чаго Бэл саркастычна дадаў: “Гэта там, дзе я хаваю грошы”.
Як вынікае з інтэрвію «Moscow Times», Бэл ганарыцца сваёй працай “па адмене палітыкі ізаляцыі” Беларусі. Бэл таксама адзначыў некаторыя пазытыўныя моманты ў апошняй лініі Лукашэнкі. Так беларускі кіраўнік даў зялёнае сьвятло адкрыцьцю офіса Эўракамісіі ў Менску. Таксама ёсьць іншыя прыкметы таго, што Лукашэнка хацеў бы лепшых дачыненьняў з Захадам. Лорд Бэл таксама падкрэсьліў, што яго кампанія атрымае ад Беларусі “мільёны даляраў у наступныя некалькі гадоў”.
Раней БелТА і іншыя афіцыйныя беларускія мэдыі паведамлялі, што падчас размовы зь беларускім прэзыдэнтам Лукашэнкам брытанскі майстра PR спыніўся на тэме ня надта добрай міжнароднай рэпутацыі Беларусі.
“Трэба шмат папрацаваць, каб гэта выправіць, — заявіў лорд Бэл. — Беларусь — гэта спакойная і міралюбная краіна. Вы адыгрываеце своеасаблівую ролю брамы ў геапалітычным і геастратэгічным пляне”.
Паводле брытанскіх мэдыяў, лорд Тыматы Бэл апошнім часам працуе над іміджам францускага лідэра Сарказі — невысокі рост апошняга (165 см) напачатку быў падставай для розных кпінаў на міжнароднай палітычнай арэне.
Сярод кліентаў лорда Бэла — Элізабэт Тэтчар, Барыс Беразоўскі, а таксама кампаніі “Дыснэй”, “МакДоналдс”, “Ролс Ройс”, “Ролекс”.