[Лукашэнка прызначыў Пуціна прэм’ерам]

“Старшыня Вышэйшага дзяржсавету Саюзнай дзяржавы Беларусі і Расеі Аляксандар Лукашэнка 27 траўня падпісаў пастанову аб прызначэньні Уладзімера Пуціна старшынём Савета міністраў Саюзнай дзяржавы. Свой подпіс пад гэтым дакумэнтам паставіў таксама прэзыдэнт Расейскай Фэдэрацыі Дзьмітрый Мядзьведзеў”,-- паведамляе прэсавая служба беларускага кіраўніка.

Саюзная дзяржава – інтэграцыйная структура, якая ня мае вялікіх паўнамоцтваў, яна звычайна ўхваляе бюджэт так званых саюзных праграм і праводзіць штогадовыя паседжаньні Вышэйшага дзяржсавету ды саюзнага саўміну.

Менскі палітоляг Віталь Сіліцкі назваў прызначэньне А. Лукашэнкам У. Пуціна цікавым, але фармальным эпізодам:

“Гэта зроблена паводле традыцыі: старшыня Вышэйшага дзяржсавету -- беларускі прэзыдэнт, а старшыня саўміну – расейскі прэм’ер-міністар. Так што гэта звычайная інстытуцыянальная рэч, ідзе ратацыя: то расейскі прэзыдэнт старшыня дзяржсавету, а беларускі прэм’ер -- старшыня саўміну, то наадварот”.

Пуцін артыкуляваў сваю палітыку ў дачыненьні да Беларусі як прасоўваньне расейскага бізнэсу

На думку В. Сіліцкага, асаблівага пажваўленьня інтэграцыйных працэсаў гэтая ракіроўка не прынясе, за 8 гадоў прэзыдэнцтва Пуцін зразумеў, як пашыраць уплыў на Беларусь:

“Пуцін артыкуляваў сваю палітыку ў дачыненьні да Беларусі як прасоўваньне расейскага бізнэсу. Цана пытаньня – кошты на энэрганосьбіты. Гэта прагучала без ранейшага прэзыдэнцкага палітэсу, ён робіць гэта як старшыня ўраду Расеі”.

Лукашэнка прызначыў Пуціна прэм’ерам

Як паведамляе прэсавая служба беларускага кіраўніка, Аляксандар Лукашэнка прызначыў Уладзімера Пуціна кіраўніком так званага саюзнага саўміна.