Лінкі ўнівэрсальнага доступу

У Гане зачынілі фіктыўную «амбасаду ЗША», якая працавала амаль 10 гадоў


Дакумэнты, захопленыя падчас паліцэйскага рэйду
Дакумэнты, захопленыя падчас паліцэйскага рэйду

Амэрыканскі Дзярждэпартамэнт распавёў аб фіктыўнай «амбасадзе ЗША», якая працавала амаль 10 гадоў у Акры, сталіцы Ганы. Яе зачынілі летам у выніку спэцыяльнай апэрацыі праваахоўных органаў Ганы і супрацоўнікаў сапраўднай амбасады ЗША ў краіне.

Кожны панядзелак, аўторак і пятніцу ад 7.30 да 12 дня над фіктыўнай «амбасадай» у Акры ўздымалі амэрыканскі сьцяг, а элемэнты інтэр’еру (фота дзейнага прэзыдэнта ЗША Барака Абамы) намякалі на афіцыйны статус установы.

Папраўдзе ёю кіравалі, паводле Дзяржаўнага дэпартамэнту, прадстаўнікі крымінальнага сьвету Турцыі і Ганы, а таксама мясцовы адвакат у крымінальных і міграцыйным справах. Супрацоўнікамі «амбасады» выступалі ангельскамоўныя грамадзяне Турцыі.

Уладальнікам установы ўдавалася хабарамі адкупляцца ад праверак, а таксама атрымліваць блянкі сапраўдных дакумэнтаў. Супрацоўнік сапраўднай амбасады ЗША ў краіне пасьля атрыманьня інфармацыі аб «амбасадзе» прыцягнуў да расьсьледаваньня паліцыю, спэцназ і бюро расьсьледаваньняў Ганы, а таксама супрацоўнікаў пасольства Канады.

Фальшывая "амбасада ЗША"
Фальшывая "амбасада ЗША"

Як аказалася, падробная амэрыканская амбасада рэклямавала свае паслугі улёткамі і плякатамі для прыцягненьня кліентаў ня толькі з Ганы, але і суседніх Кот-д’Івуару і Тога. З вуліцы прыйсьці на «гутарку» ў амбасадзе было нельга: замест гэтага ўдзельнікі банды прывозілі кліентаў з аддаленых частак заходняй Афрыкі ў сталіцу Ганы, дзе сялілі ў бліжэйшым гатэлі.

Паслугі па выдачы візаў (як сапраўдных, на аснове фальшывых зьвестак, так і падробленых) і іншыя паслугі абыходзіліся ў 6000 даляраў.

Сапраўдная амбасада ЗША ў Акры
Сапраўдная амбасада ЗША ў Акры

Фальшыўкі рабілі ў краме адзеньня — сьледзтва лічыць, што там знаходзілася прамысловая швейная машына, якой сшываюць падробныя пашпарты.

Падкуплены юрыст забараніў дэтэктывам абшукаць будынак, таму што ён нібыта праходзіў у яшчэ адной крымінальнай справе, — гэта было няпраўда. За час разглядаў затрыманых выпусьцілі пад заклад, і яны здолелі перанесьці вытворчасьць.

Некалькі падазраваных абвешчаныя ў вышук.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG