Лінкі ўнівэрсальнага доступу

Выстава «Праўда пра Курапаты» прадоўжаная яшчэ на два дні


У менскім Палацы мастацтваў працягваецца дакумэнтальна-мастацкая выстава «Праўда пра Курапаты. Факты, дакумэнты, сьведчаньні». Выстава плянавалася для экспанаваньня цягам пятніцы-нядзелі, але арганізатарам дазволілі прадоўжыць выставу яшчэ на два дні з прычыны грамадзкай цікаўнасьці да падзеі. Пра гэта на адмысловай прэсавай канфэрэнцыі паведамілі ініцыятары імпрэзы — грамадзкая ініцыятыва «Экспэрты ў абарону Курапатаў».

Сябра аргкамітэту, журналіст Марат Гаравы, у прыватнасьці, сказаў: «Толькі за два дні на выставе пабывалі каля тысячы чалавек, я асабіста правёў каля пяцідзесяці экскурсій. Прыходзяць людзі рознага ўзросту: сваякі рэпрэсаваных, моладзь, студэнты. Прыходзіў юнак, студэнт ЭГУ, які рыхтуе курсавую працу па тэме Курапатаў. Гэткім чынам, выстава выконвае сваю задачу — прыцягвае ўвагу грамадзкасьці, і перадусім моладзі, да тэмы Курапатаў і гэтай трагічнай старонкі ў гісторыі Беларусі».

Прэсавая канфэрэнцыя ў Палацы мастацтваў праходзіла адначасна з наведваньнем. Адзін з гледачоў — 29-гадовы мянчук Антон, які даведаўся пра Курапаты з кнігі Зянона Пазьняка толькі гэтым летам, а пра выставу — з інтэрнэту:

«Я прыйшоў на выставу адмыслова. Гэта вельмі важна, каб палепшыць сваю будучыню. Для гэтага неабходна ведаць і сфармаваць сваё стаўленьне да мінуўшчыны. Калі гэта ня будзе зроблена, то ў выніку будзе скажоная і будучыня».

Яшчэ адзін наведнік — спадар Вальноў, мастак зь Віцебску. Пра свае ўражаньні сказаў гэтак:

«Я як мастак зайшоў у Палац мастацтваў, але быў вельмі ўзрадаваны, што гэтая тэма гучыць. Бо гэта неспасьцігальна, каб гэткая трагедыя народа замоўчвалася дзясяткамі гадоў. І тое, што гэтая тэма запатрабаваная і выстаўленая для ўсьведамленьня — гэта вельмі важна для ўсяго грамадзтва»

Паглядзець «Праўду пра Курапаты» прыйшоў сын рэпрэсаваных Леанід Грамыка:

«Я нарадзіўся ў 1938 годзе, а бацькоў арыштавалі ў 1938 годзе. Мяне выратавала бабуля, і я рос у сям’і свайго дзядзькі, як ягоны сын, аж пакуль у 1946 годзе мама ня вызвалілася з ГУЛАГу. А мой тата быў расстраляны 1 лістапада 1938 году. І я штогод прыходжу ў Курапаты ў гэты дзень, бо ня ведаю нават, дзе ягонае месца пахаваньня — у КДБ адмовіліся паведаміць. Я вельмі асуджаю, што пастанова ўраду Беларусі аб усталяваньні помніка ў Курапатах ня выкананая. Я асуджаю дэспатаў, якія „не заўважаюць“ Курапатаў».

Чальцы ініцыятывы «Экспэрты ў абарону Курапатаў» плянуюць зрабіць выставу перасоўнай. Да канца году яе маюць паказаць у іншых гарадах Беларусі. Акрамя таго, яна атрымае электроннае ўвасабленьне і будзе зьмешчаная на адмысловым інтэрнэт-рэсурсе дзеля далейшага экспанаваньня. І — што вельмі важна — для новага папаўненьня фактамі і зьвесткамі ад людзей, якія маюць дагэтуль не абнародаваныя зьвесткі пра сваіх рэпрэсаваных родных.

Прэсавая канфэрэнцыя

Прэсавая канфэрэнцыя

Папярэднія вынікі першай выставы ў інтэрвію Свабодзе падсумаваў Вінцук Вячорка:

«Вельмі добра, што выстава адбылася і яе ўжо наведалі за тысячу асобаў. Людзі тэлефануюць і праз інтэрнэт перапытваюць, ці будзе выстава прадоўжаная. Гэта кажа пра велізарны грамадзкі попыт і на выставу, і на сам факт, што такая імпрэза адбываецца ў цэнтры Менску. Гэта азначае, што мы вяртаем слова „Курапаты“ ў грамадзкую сьвядомасьць і змушаем грамадзтва асэнсаваць трагедыю і зрабіць усё, каб падобнага з намі ніколі не паўтарылася».

Арганізатары выставы Вінцук Вячорка, Марат Гаравы, Вацлаў Арэшка

Арганізатары выставы Вінцук Вячорка, Марат Гаравы, Вацлаў Арэшка

На прэсавай канфэрэнцыі слова браў таксама Ян Дзяржаўцаў зь Віцебску. Ён распавёў пра дасьледаваньні, якія цяпер вядуцца ў мясцовасьці Хайсы пад Віцебскам, і пра адкрыцьцё яшчэ аднаго месца масавых расстрэлаў — урочышча «Цёплы лес». Паводле ягоных словаў, насуперак сьведчаньням мясцовых жыхароў, што ў 30-я гады тут забівалі мірных людзей, улады спрабуюць сьцьвярджаць, што гэтыя месцы — пахаваньні часоў апошняй вайны.

Паводле ўдзельнікаў імпрэзы, няўдзел у шанаваньні Курапатаў і хаваньне праўды пра дзяржаўны тэрор супраць мірных грамадзян краіны ставіць пытаньне: на чым баку ўлада сёньня — на баку тых, хто страляў, ці на баку расстраляных?

Выстава «Праўда пра Курапаты. Факты, дакумэнты, сьведчаньні» прадоўжыцца да 17 лістапада.

XS
SM
MD
LG